BAKI, AzerVoice, Nərmin Ağayeva

Qərb ölkələri Fələstini tanımaq vədi versələr də, bu prosesin uzadılması nəticəsində yaxın vaxtlarda tanınacaq bir Fələstin dövlətinin belə mövcud olmaya biləcəyi ehtimalı var.

AzerVoice xəbər verir ki, bu fikirləri Rusiyanın xarici işlər naziri Sergey Lavrov səsləndirib.

“Bəzi Qərb ölkələri sentyabrda BMT Baş Assambleyasında Fələstini tanıyacaqlarını bildiriblər. Amma o vaxta qədər tanınacaq bir dövlət qalmaya bilər” - deyə, Lavrov bildirib.

O, Fransa prezidenti Emmanuel Makronun, Böyük Britaniya baş naziri Kir Starmerin və Kanada baş naziri Mark Karninin açıqlamalarını xatırladaraq əlavə edib: “Əgər doğrudan da bu qədər faciələr fonunda Fələstini tanımaq istəyirsinizsə, niyə bunu indi etmirsiniz? Niyə aylarla gözləyirsiniz?”

Nazir həmçinin vurğulayıb ki, Avropa nə Yaxın Şərqdə, nə də Ukrayna məsələsində ciddi diplomatik təşəbbüs ortaya qoymur.

Ukrayna ilə bağlı məsələlərə də toxunan Lavrov bildirib ki, Rusiya etibarlı təhlükəsizlik təminatlarının hazırlanmasını dəstəkləyir, lakin Moskvanın iştirakı olmadan hər hansı mexanizmi qəbuledilməz hesab edir. O, danışıqlarda nümayəndə heyətlərinin səviyyəsinin artırılması təklifini də irəli sürdüklərini açıqlayıb.

Xatırladaq ki, avqustun 18-də ABŞ-da Ukrayna prezidenti Volodimir Zelenski ilə bir sıra Avropa liderlərinin görüşü baş tutub. Lavrovun sözlərinə görə, həmin görüşdən sonra da Avropadan real diplomatik təşəbbüslər görünməyib.