BAKI, AzerVoice, Fərid Mikayılov
ABŞ prezidenti Donald Tramp Ukrayna münaqişəsinin həlli ilə bağlı vəziyyətin yaxın iki həftə ərzində tam aydın olacağını bəyan edib.
AzerVoice xəbər verir ki, Tramp qeyd edib ki, Vaşinqton bu müddətdən sonra öz siyasətində dəyişikliyə gedə bilər.
“Mən deyərdim ki, iki həftə ərzində bu məsələdə aydınlıq olacaq. Bundan sonra biz, bəlkə də, fərqli yanaşma seçməli olacağıq. Çox tezliklə biləcəyik”- deyə o bildirib
ABŞ lideri xatırladıb ki, avqustun 15-də Alyaskada Rusiya prezidenti Vladimir Putinlə görüşdən sonra Ukraynadakı münaqişənin “yetərincə qısa müddətdə” bitə biləcəyinə inandığını bildirib.
Tramp seçki kampaniyası zamanı dəfələrlə münaqişəni 24 saat ərzində bitirə biləcəyini iddia etsə də, sonradan bu bəyanatın “sarkazm” olduğunu və əslində “problemi tez bir zamanda həll etmək istədiyini” vurğulayıb.
Trampın sözçüsü Kerolin Levitt isə bildirib ki, ABŞ təhlükəsizlik zəmanətlərinin bir hissəsi olaraq Ukraynanı havadan dəstəkləyə bilər. Onun sözlərinə görə, yüksək dəqiqlikli görüntülərin əldə edilməsi üçün ABŞ pilotlarının patrul uçuşları istisna olunmur, lakin əsas diqqət pilotsuz uçuş aparatlarına yönəlib.
Bununla yanaşı, Tramp ABŞ qoşunlarının Ukrayna ərazisinə göndərilməyəcəyini bir daha vurğulayıb. O, Fransa və Almaniyanın öz kontingentlərini yerləşdirməklə maraqlandıqlarını, lakin Avropa İttifaqının bir sıra ölkələrinin – Yunanıstan, Polşa və İtaliyanın – bu təklifdən imtina etdiyini qeyd edib.
Hazırda təxminən on ölkə münaqişənin həlli çərçivəsində Ukraynaya hərbi qüvvə göndərməyə hazır olduğunu açıqlayıb.
