BAKI, AzerVoice, Səməd Əyyubov
Kanada hakimiyyəti ABŞ-dan gətirilən bəzi mallara tətbiq olunan cavab rüsumlarından imtina edir.
AzerVoice xəbər verir ki, bu barədə Kanadanın Baş naziri Mark Karni məlumat verib.
“ABŞ, Meksika və Kanada arasında imzalanmış USMCA sazişindən irəli gələn öhdəliklərimizə uyğun olaraq bu gün bəyan edirəm ki, Kanada hökuməti ABŞ-ın daha əvvəl atdığı addımlara bənzər addım atacaq və müqavilə çərçivəsinə daxil olan bütün Amerika mallarına tətbiq olunan rüsumları ləğv edəcək” – deyə, Karni bildirib.
Bununla yanaşı, o qeyd edib ki, ABŞ-dan gətirilən polad, alüminium və avtomobillərə tətbiq olunan rüsumlar qüvvədə qalacaq və Ottava bu mövzu üzrə Vaşinqtonla intensiv danışıqlar aparacaq.
Karni əlavə edib ki, bu həftə ABŞ prezidenti Donald Tramp ilə baş tutan telefon danışığından sonra tərəflər strateji sahələrdə mövcud çətinlikləri və ticarət, investisiya, təhlükəsizlik sahələrində əməkdaşlığın genişləndirilməsini müzakirə edəcəklər.
Baş nazir həmçinin qeyd edib ki, Kanada ABŞ-la ticarət danışıqlarında irəliləyiş əldə edib:
“Hazırda Kanadanın ABŞ ilə ən yaxşı ticarət sazişi var. O, əvvəlki sazişdən fərqlidir, amma istənilən halda digər ölkələrin malik olduğundan daha yaxşıdır”.
Xatırladaq ki, avqustun 1-də Tramp Kanada üçün tarifləri 25 faizdən 35 faizə qaldırmaq barədə fərman imzalayıb. Sənəddə vurğulanıb ki, USMCA çərçivəsində güzəştli tarif rejiminə daxil olan mallar yeni tariflərə şamil edilmir.
