BAKI, AzerVoice, Səməd Əyyubov
Ukrayna Prezidenti Volodimir Zelenski sülhün təmin olunması məsələsində Rusiyaya güzəştə getmək istəmədiyini bildirib.
AzerVoice-un məlumatına görə, o, Ukraynanın Müstəqillik Günü münasibətilə yayımladığı videomüraciətində qeyd edib ki, Ukrayna bir daha heç vaxt “kompromisə məcbur edilməyəcək”.
Zelenskinin sözlərinə görə, Ukrayna sülhü Qərbin təhlükəsizlik zəmanətləri hesabına əldə edəcək.
ABŞ Prezidenti Donald Tramp isə Zelenskinin ərazi məsələlərində kompromisdən imtina etməsi ilə bağlı açıqlamalarından narazılığını ifadə edib. Tramp bəzi hallarda ərazilərin mübadiləsinin qaçılmaz olduğunu bildirib.
Qedy edək ki, avqustun 18-də Tramp Ağ Evdə Zelenski ilə təkbətək görüş keçirib. Təxminən bir saat davam edən görüşdən sonra ABŞ prezidenti Avropa liderləri və Zelenski ilə birlikdə müzakirələr aparıb. Tramp həmçinin Rusiya Prezidenti Vladimir Putinə zəng edib. Rusiya prezidentinin köməkçisi Yuri Uşakovun məlumatına görə, telefon danışığı 40 dəqiqə davam edib.
Ağ Evdə keçirilən danışıqlardan sonra Zelenski brifinqdə bildirib ki, o, Putinlə ikitərəfli görüşə hazırdır və həmin görüşdə ərazi məsələsini gündəmə gətirməyi planlaşdırır.
