BAKI, AzerVoice
Avstraliya hökuməti İranla diplomatik münasibətlərdə misilsiz addım atıb. Xarici işlər naziri Penni Vonq çərşənbə axşamı keçirdiyi mətbuat konfransında bildirib ki, İranın səfiri Əhməd Sadəqi və üç diplomat “arzuolunmaz şəxs” elan edilib və onlara ölkəni tərk etmək üçün yeddi gün vaxt verilib. Bununla yanaşı, Kanberra öz səfirini də Tehrandan geri çağırıb və səfirliyin fəaliyyətini dayandırıb.
Nazir qeyd edib ki, Avstraliya tarixində II Dünya müharibəsindən bəri ilk dəfə səfir səviyyəsində diplomat qovulur. Vonqun sözlərinə görə, bu qərar “İranın tamamilə qəbuledilməz hərəkətlərinə” cavabdır.
Baş nazir Entoni Albanese isə xüsusi xidmət orqanlarının “çox narahatedici nəticəyə” gəldiyini açıqlayıb. O bildirib ki, İran 2024-cü ilin oktyabrında Sidneydə “Louis Continental” adlı yəhudi icmasına aid kafe, eləcə də dekabr ayında Melburnda “Adas İsrail” sinaqoquna qarşı törədilən yandırma hücumlarının arxasında dayanır. Hər iki hadisədə insan tələfatı qeydə alınmasa da, hökumət bunu “Avstraliya ərazisində xarici dövlətin həyata keçirdiyi təhlükəli düşmənçilik aktı” kimi qiymətləndirib.
Baş nazir əlavə edib ki, Tehranın Avstraliyadakı digər antisemit hücumlarda da əli ola bilər. O, bu hücumları “cəmiyyətdə nifaq toxumu səpmək və sosial birliyi pozmaq cəhdi” adlandırıb.
Kanberra həmçinin İran İslam İnqilabı Keşikçiləri Korpusunun (SEPAH) terror təşkilatı kimi tanınması üçün hüquqi proseslərə start verib.
Nazir Vonq vurğulayıb ki, diplomatik kanallar tam bağlanmasa da, əsas prioritet Avstraliya vətəndaşlarının maraqlarını qorumaqdır.
“Biz bu qərarı İranın hərəkətləri qəbuledilməz olduğu üçün verdik. Bununla belə, avstraliyalıların təhlükəsizliyi üçün minimal diplomatik əlaqələr saxlanacaq.”-deyə o bildirib.
Qeyd edək ki, Avstraliyanın Tehrandakı səfirliyi 1968-ci ildən fəaliyyət göstərirdi. Son illərdə, xüsusilə 2023-cü ildə Qəzza müharibəsindən sonra ölkədə yəhudi icmalarına qarşı vandallıq və antisemit hücumların sayı kəskin artıb.
