BAKI, AzerVoice, Səməd Əyyubov
Böyük Britaniyada 22 qeyri-hökumət təşkilatı (QHT) hökuməti Qəzzadakı mülki əhalinin soyqırımında iştirak edən şirkətlərə qarşı tədbir görməyə çağırıb.
AzerVoice xəbər verir ki, bununla bağlı aralarında "Amnesty International" və Silah Ticarətinə Qarşı Kampaniyanın (CAAT) da olduğu 22 QHT Qəzzaya dair birgə bəyanat yayıb.
Bəyanatda Böyük Britaniya hökumətindən İsrailin Qəzzada həyata keçirdiyi soyqırımdan mənfəət götürən şirkətlərə qarşı sanksiya tətbiq etməsi tələb olunub.
Vurğulanıb ki, insan hüquqları standartlarına əməl edən hər bir şirkət İsrail işğalı ilə əlaqəsini kəsməlidir. Eyni zamanda, Böyük Britaniyanın İsraillə ticarət əlaqələrinə icazə verməsinin regiondakı iqtisadiyyatı gücləndirdiyi və işğala töhfə verdiyi qeyd edilib.
QHT-lər hökumətə İsrailə silah embarqosu tətbiq etmək, Fələstin torpaqlarına məskunlaşan israillilərlə ticarəti qadağan etmək, İsraillə mövcud ticarət sazişini dayandırmaq və Böyük Britaniya şirkətlərinin rəhbərlərini beynəlxalq humanitar hüququn pozulmasına görə məsuliyyətə cəlb etmək çağırışı ediblər.
Bəyanatda ittihamların hədəfində İsrailə silah tədarük edən "BAE Systems" şirkəti, "Barclays" Bankı, Edinburq Universiteti, həmçinin London Birjasında fəaliyyət göstərən "Airbnb", "Amazon", "Blackrock" və "Palantir" kimi şirkətlərin olduğu bildirilib.
Məsələ ilə bağlı Böyük Britaniya hökumətinin sözçüsü isə açıqlamasında Qəzzada mülki insanların öldürülməsinin qəbuledilməz olduğunu vurğulayıb.
“Böyük Britaniya müharibənin qarşısını almağın yeganə yolu kimi dərhal atəşkəs çağırışını davam etdirir” - deyə, o bildirib. O həmçinin ölkənin İsraillə azad ticarət sazişi üzrə danışıqları dayandırdığını və ötən ilin sentyabrında İsrailə verilən 30 silah ixrac lisenziyasının ləğv edildiyini xatırladıb.
Qeyd edək ki, hazırda Qəzza zolağında vəziyyət gərgin olaraq qalır. İsrail ordusunun hücumları davam edir və bölgədə humanitar vəziyyət getdikcə ağırlaşır.
