BAKI, AzerVoice, Səməd Əyyubov
ABŞ prezidenti Donald Trampın və onun administrasiyasının əleyhdarları ölkə üzrə yüzlərlə etiraz aksiyası keçirməyə hazırlaşırlar.
AzerVoice xəbər verir ki, nümayişlər sentyabrın 1-də qeyd olunacaq Əmək Günü münasibətilə təşkil ediləcək.
Məlumata görə, “May Day Strong” təşkilatı həmkarlar ittifaqları ilə birlikdə “İşçilər milyarderlərdən üstündür” şüarı altında 765 aksiyanın keçirilməsini planlaşdırır. Bundan başqa, respublikaçılar tərəfindən seçki dairələrinin sərhədlərinin dəyişdirilməsinə qarşı çıxan qruplar da milli bayram günü nümayişlər təşkil edəcəklər.
Məlumat üçün bildirək ki, ABŞ-da Əmək Günü hər il sentyabrın ilk bazar ertəsi qeyd olunur. İlk dəfə bu gün 1882-ci il sentyabrın 5-də Nyu-Yorkda təxminən 10 min nəfərin Broadway küçəsində keçirdiyi paradla bayram edilib. 1887-ci ildə Oreqon ştatı sentyabrın ilk bazar ertəsini rəsmi istirahət günü elan edib. Yeddi il sonra isə ABŞ Konqresi Əmək Gününə ümummilli bayram statusu verən qanunu qəbul edib.
