BAKI, AzerVoice, Fərid Mikayılov
Avropa İttifaqının (Aİ) xarici siyasət rəhbəri Kaja Kallas bəyan edib ki, qarşıdakı 30 gün İranın nüvə proqramı ətrafında diplomatik həllin tapılması üçün “önəmli fürsət pəncərəsi” açır.
AzerVoice xəbər verir ki, bu barədə Kallas cümə günü jurnalistlərə açıqlamasında bildirib.
O, bildirib ki, Avropa dövlətlərinin sanksiyaları yenidən qüvvəyə gətirmək üçün işə saldıqları mexanizm, diplomatiya üçün yeni imkan yaradır.
“Biz indi yeni mərhələyə daxil oluruq. Qarşıdakı 30 gün bizə həqiqətən də diplomatik yollarla həll tapmaq imkanı verir” – deyə Kallas vurğulayıb.
Fransa, Almaniya və Böyük Britaniya cümə axşamı İranın nüvə proqramı ilə bağlı BMT sanksiyalarını bərpa etmək istiqamətində addım atıblar. Bu proses 2015-ci ildə imzalanmış nüvə sazişində nəzərdə tutulmuş və “snapback” adlandırılan mexanizm vasitəsilə həyata keçirilir.
Diplomatların açıqlamasına görə, prosedur veto imkanını istisna edir və təxminən bir ay ərzində qüvvəyə minə bilər.
Sanksiyaların bərpası ilə Tehranın xaricdəki aktivləri dondurulacaq, silah ticarətinə məhdudiyyətlər qoyulacaq və ballistik raket proqramı ilə bağlı fəaliyyətlərə sərt məhdudiyyətlər tətbiq ediləcək. Bu isə onsuz da ağır iqtisadi böhran yaşayan İran iqtisadiyyatını daha da sıxışdıracaq.
Ekspertlərə görə, 30 günlük müddət ərzində İran tərəfindən diplomatik səylərin intensivləşməsi gözlənilir. Böhran, Tehranın Beynəlxalq Atom Enerjisi Agentliyi (MAQATE) müfəttişləri ilə əməkdaşlıqdan imtina etməsi ilə başlamışdı.
