BAKI, AzerVoice, Səməd Əyyubov
ABŞ Quru Qoşunları Kaliforniya startapı “TurbineOne” ilə döyüş tapşırıqlarında süni intellekt texnologiyalarının tətbiqini nəzərdə tutan müqavilə imzalayıb.
AzerVoice xəbər verir ki, müqavilənin dəyəri 98,9 milyon dollar təşkil edir. Layihə çərçivəsində kəşfiyyat məlumatlarını emal edən və döyüş meydanında mümkün təhlükələri, o cümlədən düşmənin gizli mövqelərini və ya pilotsuz uçuş aparatlarını (PUA) müəyyənləşdirən proqram təminatından istifadə olunacaq.
“TurbineOne” şirkətinin proqram təminatı smartfonlarda, noutbuklarda və dronlarda işləyə bilir. Şirkətin açıqlamasına görə, döyüş meydanından daxil olan məlumatların təhlil müddəti 20 saatdan cəmi 20 saniyəyə endiriləcək.
Xatırladaq ki, bundan əvvəl Pentaqon orduda yeni texnologiyaların tətbiqini sürətləndirmək məqsədilə süni intellekt sahəsində aparıcı dörd şirkət olan “Google”, “OpenAI”, “xAI” və “Anthropic” ilə də müqavilə imzalamışdı. Hər bir müqavilənin dəyəri ən azı 200 milyon dollar təşkil edir, lakin dəqiq məbləğ açıqlanmayıb.
