BAKI, AzerVoice, Nailə Babazadə
İspaniyanın azlıq sol koalisiya hökuməti, Qəzzada baş verən soyqırıma cavab olaraq İsrailə qarşı 9 maddəlik sanksiya paketini qəbul edib. Baş nazir Pedro Sançesin dünən elan etdiyi tədbirlər bu gün Nazirlər Kabinetinin iclasında rəsmən təsdiqlənib və dərhal qüvvəyə minib.
AzerVoice xəbər verir ki,İclasdan sonra mətbuata açıqlama verən Xarici İşlər naziri Xose Manuel Albarez bildirib ki, "Qəzzada bu qədər günahsız insanın öldürülməsi qarşısında səssiz və hərəkətsiz qala bilməzdik". Onun sözlərinə görə, "Qəzzadakı soyqırıma qarşı tədbirlər və Fələstin xalqına dəstək" adlı paket beynəlxalq hüquq və insan haqları çərçivəsində hazırlanıb.
Albarez vurğulayıb ki, İspaniya iki dövlətli həll modelini dəstəkləməyə davam edir və bu istiqamətdə Avropa İttifaqı (Aİ) çərçivəsində daha geniş tədbirlərin görülməsini istəyir. O, Danimarkanın paytaxtı Kopenhagendə keçirilən Aİ xarici işlər nazirlərinin görüşündə təqdim etdiyi təklifə (İsrailə silah embarqosu, ticarət əlaqələrinin kəsilməsi və bütün Aİ proqramlarının dayandırılması) tam dəstəyin hələlik formalaşmadığını, lakin nitelikli əksəriyyətə yaxın olduqlarını qeyd edib.
Nazir, İsrailin Aİ ilə imzaladığı Tərəfdaşlıq Müqaviləsinin 2-ci maddəsini açıq şəkildə pozduğunu və bununla bağlı Avropa Komissiyasının hesabatının olduğunu da əlavə edib. BMT Baş Assambleyasının 21 sentyabr tarixində keçiriləcək toplantısında isə məsələnin daha ciddi müzakirəyə çıxarılacağını bildirib.
Sanksiyalar paketində nə var?
İspaniya hökumətinin qəbul etdiyi 9 maddəlik sanksiya tədbirləri bunlardır:
- 2023-cü ilin oktyabrından etibarən qüvvədə olan İsrailə silah embarqosunun hüquqi əsaslarla daimi və qanuni şəkildə möhkəmləndirilməsi.
- İsrail ordusuna yanacaq daşıyan bütün gəmilərin İspaniya limanlarından keçməsinin qadağan edilməsi.
- İsrailə müdafiə təchizatı daşıyan bütün rəsmi təyyarələrin İspaniya hava məkanına girişinin qadağan olunması.
- Qəzzada soyqırım, insan hüquqları pozuntuları və müharibə cinayətlərində birbaşa iştirak edən şəxslərin İspaniyaya girişinin qadağan olunması.
- Qəzza və İordan çayının qərb sahilindəki qanunsuz yaşayış məntəqələrindən məhsul idxalının qadağan olunması, fələstinlilərin zorla köçürülməsinə qarşı tədbirlərin görülməsi və iki dövlətli həllin qorunub saxlanması.
- Qanunsuz yaşayış məntəqələrində yaşayan İspaniya vətəndaşlarına göstərilən konsulluq xidmətlərinin qanuni minimum səviyyəyə endirilməsi.
- Refah sərhəd-keçid məntəqəsindəki Aİ sərhəd yardım missiyasına İspaniya hərbçilərinin sayının artırılması və Fələstinlə kənd təsərrüfatı, ərzaq təhlükəsizliyi və tibbi yardım sahələrində yeni əməkdaşlıq layihələrinin həyata keçirilməsi.
- İspaniyanın BMT-nin UNRWA təşkilatına yardımını 10 milyon avro artırması.
- Qəzzaya yönəlik insani yardım və əməkdaşlıq büdcəsinin 2026-cı ilə qədər 150 milyon avroya çatdırılması.
İsrailə qarşı diplomatik addımlar davam edir
Nazir Albarez, İsrailə qarşı bu addımların İspaniyanın tarixində ikinci dəfə diplomatik münasibətlərin dayandırılmasına səbəb ola biləcəyini, ancaq hazırda hələ bu səviyyədə qərar alınmadığını bildirib. O, 1980-ci ildə Qvatemala ilə münasibətlərin kəsildiyini, lakin İsraillə iki dövlətli həll istiqamətində diplomatik dialoqun davam edəcəyini qeyd edib.
