BAKI, AzerVoice
“Taliban” hərəkatı bildirib ki, təşkilat şənbə günü ABŞ prezidenti Donald Trampın administrasiyasının nümayəndələri ilə Əfqanıstan və Amerika arasında münasibətlərin normallaşdırılması məsələsini müzakirə edib. Ağ Ev görüş barədə rəsmi açıqlama yaymayıb və şərh verməkdən imtina edib.
Talibanın bəyanatına görə, xarici işlər naziri Əmir Xan Müttəqi Trampın xüsusi girov məsələləri üzrə elçisi Adam Böhler və ABŞ-ın digər nümayəndəsi Zalmay Xəlilzadla görüşüb. Görüşdən fotolar da yayımlanıb.
Bəyanatda qeyd olunub ki, tərəflər ikitərəfli münasibətlərin inkişafı, vətəndaşlarla bağlı məsələlər və Əfqanıstana investisiya imkanlarını müzakirə ediblər. ABŞ tərəfi həmçinin ötən ay ölkənin şərqini silkələyən zəlzələ qurbanları ilə bağlı başsağlığı verib.
Görüş, Talibanın amerikalı turist Corc Qlizmanı azad etməsindən sonra baş tutub. Bu, Tramp hakimiyyətə gəldikdən sonra hərəkatın sərbəst buraxdığı üçüncü ABŞ vətəndaşıdır.
Eyni zamanda, Taliban Trampın yeni səyahət qadağasını – Əfqanıstan vətəndaşlarının ABŞ-a girişini yasaqlayan qərarını kəskin tənqid etmişdi.
Hərəkatın açıqlamasında qeyd olunub ki, tərəflər məhbus mübadiləsi barədə də razılığa gəliblər. Lakin nə say, nə də məhbusların kimliyi barədə detallı məlumat verilməyib.
