BAKI, AzerVoice, Fərid Mikayılov
İranın xarici işlər naziri Abbas Əraqçi Dohada İraq və Livanlı həmkarları ilə görüşərək bölgədə təhlükəsizlik və sabitliyin qorunmasının vacibliyini vurğulayıb.
AzerVoice xəbər verir ki, görüşlər İsrailin Qətərə qarşı hücumundan təxminən bir həftə sonra baş tutub.
Əraqçi bazar günü Ərəb Liqası və İslam Əməkdaşlıq Təşkilatının (İƏT) dövlət başçılarının fövqəladə sammitinə hazırlıq məqsədilə keçirilən nazirlər görüşünün kənarında İraqın xarici işlər naziri Fuad Hüseynlə regional vəziyyəti müzakirə edib.
İranlı diplomat Livanın xarici işlər naziri Yusif Racci ilə də bir araya gələrək Qəzzadakı soyqırım, İsrailin Livana və bölgə ölkələrinə qarşı davam edən hücumları və beynəlxalq ictimaiyyətin təcili addımlar atmasının zəruriliyini gündəmə gətirib.
Bundan öncə Əraqçi Pakistan, Somali və Misir xarici işlər nazirləri ilə də müzakirələr aparmışdı. Bu görüşlərdə regional hadisələr və İranın nüvə proqramı əsas müzakirə mövzuları olub.
Qətərə qarşı İsrail hücumu fonunda toplanan Ərəb Liqası –İƏT fövqəladə zirvəsi bölgədə artan gərginliyi müzakirə edir və Qəzza müharibəsinin dayandırılması üçün beynəlxalq koordinasiya axtarır.
