BAKI,AzerVoice, Fərid Mikayılov

İran Parlamentinin spikeri Məhəmməd Baqir Qalibaf bəyan edib ki, Qərb dövlətləri danışıqlardan İslam Respublikasına təzyiqləri artırmaq və İranın raket imkanlarını məhdudlaşdırmaq üçün sui-istifadə edirlər.

AzerVoice xəbər verir ki, Qalibaf sosial şəbəkədə paylaşdığı açıqlamada Avropa ölkələrinin “snapback mexanizmini” işə salaraq BMT Təhlükəsizlik Şurasının (TŞ) ləğv olunmuş qətnamələrini bərpa etmək cəhdinə münasibət bildirib və bu addımı “qanunsuz” adlandırıb.

Parlament spikeri vurğulayıb ki, Rusiya və Çin kimi TŞ-nin daimi üzvləri bu addımı açıq şəkildə qanunsuz hesab etdiyinə görə, heç bir ölkə belə qətnamələrə əməl etməyə borclu deyil. O əlavə edib ki, İran da bu “qanunsuz” qərarları, o cümlədən uranın zənginləşdirilməsinin dayandırılmasını qəbul etməyəcək.

Qalibaf qeyd edib ki, bu qətnamələrdə göstərilən sanksiyaların təsiri, ABŞ-ın artıq tətbiq etdiyi məhdudiyyətlərlə müqayisədə çox azdır və onların icrası ciddi hüquqi maneələrlə üzləşir.

O xəbərdarlıq edib ki, əgər hər hansı ölkə bu qətnamələr əsasında İrana qarşı addım atarsa, Tehran “ciddi qarşı tədbirlər” görəcək.

Qalibafın sözlərinə görə, Avropa ölkələrinin israrla “snapback” mexanizminə əl atması iki mühüm reallığı üzə çıxarır:

Qərb üçün danışıqlar sadəcə İranın raket gücünü zəiflətmək məqsədi daşıyan aldadıcı vasitədir.

İkinci olaraq, Qalibaf vurğulayıb ki, İranın milli təhlükəsizliyinin yeganə təminatı ölkənin öz gücüdür.