BAKI,AzerVoice, Fərid Mikayılov
İran Xarici İşlər Nazirliyi Avropa İttifaqı (Aİ) ölkələrinin səfirlərini Tehrana çağıraraq blokun Fars körfəzi regionuna dair “qarışan mövqeyinə” və ölkənin müdafiə proqramı ilə bağlı səsləndirilən iddialara etiraz edib.
AzerVoice xəbər verir ki, İranın siyasi işlər üzrə xarici işlər nazir müavini Məcid Taxt-e Rəvançi, səfirlərlə görüş zamanı Aİ və Fars Körfəzi Əməkdaşlıq Şurasının (GCC) son bəyanatında yer alan ifadələrin ölkənin ərazi bütövlüyünə və suverenliyinə zidd olduğunu bildirib.
Görüşdə Rəvançi, Əbu Musa, Böyük Tunb və Kiçik Tunb adalarının İranın mübahisəsiz və əbədi suverenliyinə daxil olduğunu vurğulayıb.
O, Avropa İttifaqının Birləşmiş Ərəb Əmirliklərinin əsassız ərazi iddialarına dəstəyini “milli suverenlik prinsiplərinin pozulması” kimi qiymətləndirib və blokun “siyasi və qərəzli mövqeyini” kəskin tənqid edib.
Nazir müavini həmçinin İranın raket və müdafiə proqramı ilə bağlı səsləndirilən iddiaları “daxili işlərə müdaxilə” adlandıraraq rədd edib.
“İranın müdafiə qabiliyyətləri, o cümlədən raket proqramı, özünümüdafiə hüququnun təbii hissəsidir və regional təhlükəsizliyə töhfə verir” - deyə Rəvançi bildirib.
Rəvançi həmçinin Böyük Britaniya, Fransa və Almaniyanın (E3) BMT Təhlükəsizlik Şurasının sanksiyalarını “snapback” mexanizmi vasitəsilə yenidən tətbiq etmək təşəbbüsünü tənqid edib.
O qeyd edib ki, Aİ JCPOA-nın (Birgə Hərtərəfli Fəaliyyət Planı) birgə komissiyasının koordinatoru kimi öz öhdəliklərini yerinə yetirməyib və diplomatik prosesi əngəlləyib.
