BAKI, AzerVoice, Orxan Qədirzadə
ABŞ nümayəndəsi İsraildəki çıxışı zamanı Türkiyəyə təşəkkür edib.
AzerVoice xəbər verir ki, ABŞ prezidenti Donald Trampın Orta Şərq üzrə xüsusi nümayəndəsi Stiv Vitkof İsrailin Təl-Əviv şəhərində çıxış edərkən, Qəzzada atəşkəsin əldə olunmasında göstərdiyi səylərə görə Türkiyə, Qətər və Misirə təşəkkür edib.
“Bu nəticəyə çatmağımızda Türkiyə, Qətər və Misir liderlərinin rolu böyük olub. Onlara təşəkkür edirik.”-deyə o, bildirib.
Vitkof əlavə edib ki, ABŞ Prezidenti Donald Tramp Orta Şərqdə sülhün mümkünsüz olmadığını sübut edib.
ABŞ rəsmisinin çıxışı zamanı İsrailin baş naziri Benyamin Netanyahunun adını çəkməsi zalda gərginliyə səbəb olub. Tədbirdə iştirak edən insanlar Netanyahuya qarşı etiraz şüarları səsləndiriblər və “Utan!” -deyə qışqırıblar.
Etirazlara cavab olaraq Vitkof “Netanyahunun da sülhə qatqısı olub”-deyə bildirib.
Səhnədə Vitkofun arxasında yer alan İvanka Tramp və Trampın kürəkəni Cared Kuşner isə bu anları gülümsəyərək izləyiblər.
