BAKI, AzerVoice, Orxan Qədirzadə
ABŞ-ın sabiq milli təhlükəsizlik müşaviri Con Bolton məxfi məlumatlarla qanunsuz davranmaqda ittiham olunduqdan sonra federal hakimiyyət orqanlarına təslim olub. Hadisə Donald Tramp administrasiyası ilə keçmiş əməkdaşları arasında yeni siyasi gərginlik yaradıb.
AzerVoice xəbər verir ki, Trampın siyasi rəqiblərinə qarşı təzyiq kampaniyası çərçivəsində başladılan istintaq nəticəsində Boltona ABŞ-ın casusluq haqqında qanununa əsasən 18 maddə üzrə ittiham irəli sürülüb. Bunlardan 8-i dövlət müdafiəsi ilə bağlı məlumatların ötürülməsi, 10-u isə bu məlumatların qanunsuz saxlanması ilə əlaqədardır.
Bolton 2018–2019-cu illərdə Tramp administrasiyasında çalışıb və sonradan onun ən sərt tənqidçilərindən birinə çevrilib.
Associated Press agentliyinin məlumatına görə, o, məxfi məlumatları öz ailə üzvləri ilə paylaşmaqda ittiham olunur. Həmin materialların Boltonun hazırladığı kitabda istifadə oluna biləcəyi ehtimal edilir.
“Mən öz qanuni davranışımı müdafiə etməyə və Trampın hakimiyyətdən sui-istifadəsini ifşa etməyə hazıram.”-deyə, Bolton yazılı açıqlamasında bildirib
Onun vəkili Əbi Louell isə qeyd edib ki, Bolton heç bir məxfi məlumatı qanunsuz şəkildə paylaşmayıb.
Tramp isə jurnalistlərin sualına cavabında sabiq müşavirini sərt şəkildə tənqid edib və deyib ki, Bolton, pis adamdır.
Mütəxəssislərin fikrincə, Boltonun həbsi Trampın siyasi nüfuzunu möhkəmləndirmək cəhdi kimi qiymətləndirilir. Hadisə həm də ABŞ-da ədliyyə sisteminin müstəqilliyi və siyasi təsirlərə açıq olması ilə bağlı yeni müzakirələrə səbəb olub.
