BAKI, AzerVoice, Orxan Qədirzadə
ABŞ Prezidenti Donald Trampın administrasiyasında təhlükəsizlik narahatlıqları fonunda bir sıra yüksək vəzifəli rəsmilərin Vaşinqtondakı evlərini tərk edərək hərbi bazalara köçdüyü bildirilir.
AzerVoice-un məlumatına görə, ABŞ müharibə naziri Pit Hegseth, Dövlət katibi Marko Rubio və bir neçə digər kabinə üzvü paytaxtdan kənardakı hərbi hissələrdə yerləşdirilən xüsusi yaşayış sahələrinə keçiblər. Rəsmilər sentyabr ayında mühafizəkar fəal Çarli Kirkə qarşı törədilən sui-qəsddən sonra təhlükəsizlik tədbirlərinin artırılmasını tələb etmişdilər.
Kirk-in Yuta ştatında qətlə yetirilməsinin ardınca Ağ Ev Antifa təşkilatını daxili terror qurumu kimi tanıdığını açıqlamışdı. Bu qərar ölkənin müxtəlif bölgələrində etirazlara, dövlət rəsmilərinə qarşı təhdidlərin artmasına və onların şəxsi ünvanlarının internetdə ifşa edilməsinə gətirib çıxarıb.
Administrasiyanın adının açıqlanmasını istəməyən yüksək vəzifəli üzvü bildirib ki, yaşayış yerini tərk edib hərbi bazaya köçməsi “müəyyən xarici təhlükə ilə əlaqədardır”.
Hazırda ümumilikdə altı yüksək vəzifəli ABŞ rəsmisinin hərbi bazalarda xüsusi ayrılmış evlərdə yaşadığı iddia olunur.
ABŞ Müdafiə Nazirliyinin mənbələrinə əsasən, Müdafiə naziri Pit Hegseth və Dövlət katibi Marko Rubio Fort McNair bazasının “Generals’ Row” adlı hissəsinə köçürülüb.
ABŞ Daxili Təhlükəsizlik naziri Kristi Noem-in Anacostia–Bolling bazasında, Quru Qoşunları naziri Den Driskollun isə Myer-Henderson Hall bazasında məskunlaşdığı bildirilir.
Artan tələb səbəbilə hərbi bazalarda yaşayış yerlərinin çatışmazlığı yaranıb. Hətta keçmiş Milli Kəşfiyyat direktoru Tulsi Qabbardın Fort McNair-ə dair müraciətinin rədd edildiyi iddia olunur.
Yüksək rütbəli general və admiral üçün nəzərdə tutulmuş evlərin mülki hökumət üzvlərinə verilməsi hərbi komandanlıqda narahatlıq yaratdığı iddia edilir. Bu prosesin yalnız təhlükəsizlik addımı kimi deyil, həm də ABŞ-da daxili siyasi bölünmənin dərinləşməsinin göstəricisi kimi qiymətləndirilir.
Bildirilir ki, ölkə faktiki olaraq “görünməyən xarici risklər”, eyni zamanda daxili etirazlar və siyasi təhdidlər fonunda təhlükəsizlik vəziyyətinin sərt şəkildə qiymətləndirildiyi mərhələyə keçib.
“The Guardian” nəşrinin əldə etdiyi Pentaqon sənədində bütün ştatlarda “sürətli reaksiya qüvvələri”nin yaradılması göstərişi verildiyi qeyd olunur. Sənədə görə, hər ştat orta hesabla 500 nəfərlik xüsusi təlim keçmiş əsgər ayıracaq və ümumilikdə 23 500 hərbi qulluqçu daxili təhlükəsizlik üzrə tez cavab verən qüvvə kimi hazırlanacaq.
Qüvvələrə qalxanlar, rezin dəyənəklər, elektroşok cihazları və gözyaşardıcı qazdan istifadə üzrə xüsusi təlimlərin keçirilməsi nəzərdə tutulur.
Ekspertlər bildirirlər ki, müharibə elan olunmadan yüksək vəzifəli rəhbərliyin hərbi bazalara yerləşdirilməsi ABŞ tarixində nadir hadisədir və ölkənin daxili təhlükəsizlik konsepsiyasında yeni mərhələyə keçildiyini göstərir.
