BAKI,AzerVoice, Fərid Mikayılov
İran Xarici İşlər Nazirliyinin sözçüsü İsmayıl Bəqai İsrail rejiminin Suriya cənubundakı Beit Kinn bölgəsinə endirdiyi quru və hava hücumlarını pisləyib. Hücumlar nəticəsində bir neçə suriyalı vətəndaşın həlak olduğu bildirilib.
AzerVoice xəbər verir ki,nazirlik sözçüsü açıqlamada region ölkələrinin milli suverenlik və ərazi bütövlüyünü İsrail təcavüzünə qarşı müdafiə etmək hüququna malik olduğunu vurğulayıb.
Bəqai suriyalı gənclərin İsrail qüvvələrinə qarşı dirənişini davam edən təcavüzkar hərəkətlərə “təbii və legitim reaksiya” adlandırıb.
Sözçü həmçinin İsrail rejiminin beynəlxalq hüququ ardıcıl şəkildə pozduğunu, bölgədəki cinayətlərinin genişləndiyini qeyd edib.
Bəqai BMT Təhlükəsizlik Şurasının Suriyanın və Livanın suverenliyinə qarşı bu cür aqressiyalara münasibətdə fəaliyyətsizliyindən təəssüfləndiyini bildirib və bunun qlobal sülh və sabitlik üçün təhlükəli nəticələr yarada biləcəyi ilə bağlı xəbərdarlıq edib.
