BAKI, AzerVoice, Fərid Mikayılov
Əfqanıstan rəsmiləri Spin Boldak rayonunda Pakistan qüvvələri ilə baş verən ağır atışma nəticəsində 4 mülki şəxsin öldüyünü açıqlayıb.
AzerVoice xəbər verir ki, hadisə cümə günü gecə saatlarında baş verib. Hər iki tərəf atəşi bir-birinin başladığını iddia edir.
Əfqanıstan Taliblərinin sözçüsü Zəbihullah Mücahid sosial şəbəkədə bildirib ki, Pakistan qüvvələri Spin Boldak istiqamətində hücuma keçib və buna cavab olaraq əfqan qüvvələri atəş açıb.
Pakistan Baş nazirinin sözçüsü Moşərrəf Zeydi isə əksini deyərək, “Əfqan qüvvələri səbəbsiz atəş açıb” ifadəsini işlədib və Pakistanın ərazi bütövlüyünü qorumaqda “tam ayıq olduğunu” vurğulayıb.
İki ölkə arasında münasibətlər Talibanın 2021-ci ildə hakimiyyətə qayıtmasından sonra daha da pisləşib. İslamabad Əfqanıstanı Pakistan Talibana (TTP), Bəlucistan Azadlıq Ordusuna və İŞİD-in yerli qolu ISKP-yə sığınacaq verməkdə ittiham edir. Taliban isə bu iddiaları rədd edərək Pakistanı “dezinformasiya yaymaqda və gərginliyi qızışdırmaqda” günahlandırır.
2023 və 2024-cü illərdə sərhəd boyunca bir neçə dəfə gərginlik yaşanıb. Oktyabrda baş vermiş böyük toqquşmalarda hər iki tərəfdən təxminən 70 nəfər həlak olmuş, yüzlərlə adam yaralanmışdı. Tərəflər 19 oktyabrda Dohada atəşkəs imzalasa da, ardıcıl danışıqlar – o cümlədən Türkiyə, Qatar və Səudiyyə Ərəbistanında keçirilən son görüşlər – dayanıqlı razılaşma əldə etməyə imkan verməyib.
Əfqanıstan son həftələr Pakistanı sərhəd vilayətlərində hava zərbələri endirməkdə ittiham edir. Noyabrın sonunda Xost vilayətinə endirilən və Pakistan ordusuna aid edildiyi iddia edilən hücumda 9 uşaq və bir qadının öldüyü bildirilir. Pakistan isə bu hücumun onlara aid olmadığını bəyan edib.
