BAKI,AzerVoice, Fərid Mikayılov
ABŞ Mərkəzi Komandanlığı (CENTCOM) Suriyada İŞİD terror qruplaşmasına qarşı həyata keçirilən “Hawkeye” (Şahin Gözü) əməliyyatı çərçivəsində 70-dən çox hədəfin vurulduğunu açıqlayıb.
AzerVoice xəbər verir ki, əməliyyat dekabrın 13-də Suriyanın Palmira (Tədmur) bölgəsində İŞİD tərəfindən həyata keçirilən və 2-si ABŞ hərbçisi olmaqla 3 ABŞ vətəndaşının həlak olduğu hücuma cavab olaraq icra edilib. Bildirilib ki, əməliyyat ABŞ Prezidenti Donald Trampın göstərişi ilə başladılıb.
Açıqlamada qeyd olunub ki, ABŞ qüvvələri döyüş təyyarələri, hücum helikopterləri və ağır silahlardan istifadə edərək Suriyanın mərkəzində yerləşən bir sıra mövqelərdə İŞİD-ə məxsus infrastruktur, silah və sursat anbarlarını hədəfə alıb. Əməliyyat zamanı 100-dən çox döyüş sursatından istifadə edildiyi bildirilib. İordaniya Silahlı Qüvvələrinin də döyüş təyyarələri ilə əməliyyata dəstək verdiyi vurğulanıb.
ABŞ-ın müdafiə naziri Pit Heqset sosial şəbəkə paylaşımında əməliyyatın müharibə elanından çox, “intiqam mesajı” daşıdığını bildirib. O qeyd edib ki, ABŞ vətəndaşlarını hədəf alanlar ABŞ-ın onları tapacağını və məhv edəcəyini bilməlidirlər.
ABŞ Prezidenti Donald Tramp da mövzu ilə bağlı açıqlamasında İŞİD mövqelərinə qarşı son dərəcə güclü zərbələrin endirildiyini deyib. Tramp Suriyadakı hökumətin əməliyyata dəstək verdiyini bildirərək, “İŞİD aradan qaldırılsa, Suriya parlaq gələcəyə sahib ola bilər” fikrini səsləndirib.
CENTCOM-un məlumatında vurğulanıb ki, əməliyyatın əsas məqsədi İŞİD-in Suriyadakı hərbi imkanlarını və infrastrukturunu zəiflətməkdir. Komandanlıq əməliyyatda iştirak edən döyüş təyyarələri və helikopterlərin görüntülərini də ictimaiyyətə təqdim edib.
Qeyd edək ki, dekabrın 13-də Suriyada təkbaşına hərəkət edən bir İŞİD üzvünün təşkil etdiyi hücum nəticəsində 2 ABŞ hərbçisi və 1 ABŞ vətəndaşı həlak olub, daha 3 ABŞ hərbçisi isə yaralanıb.
