BAKI, AzerVoice, Orxan Qədirzadə
İsveçli iqlim fəalı Qreta Tunberq Londonda keçirilən fələstinlilərə dəstək aksiyası zamanı polis tərəfindən saxlanılıb.
AzerVoice-un məlumatına görə, aksiya Böyük Britaniyada fəaliyyəti qadağan edilmiş “Palestine Action” qruplaşmasına dəstək məqsədilə təşkil olunub. Etiraz aksiyası Londonda yerləşən və İsrailin müdafiə sənayesi şirkəti ilə əməkdaşlıq edən “Aspen Insurance” şirkətinin ofisi qarşısında keçirilib.
Aksiyanın təşkilatçısı olan “Prisoners for Palestine” platforması bildirib ki, Tunberq “Palestine Action” qruplaşmasının həbs edilmiş üzvlərinə dəstək məqsədilə keçirilən aksiyada iştirak edib. Etirazçılar ofisin girişinə qırmızı boya səpərək oturaq aksiya keçiriblər.
Platformanın sosial şəbəkədə yaydığı açıqlamada qeyd olunub ki, Qreta Tunberq üzərində “Mən ‘Palestine Action’ məhbuslarını dəstəkləyirəm. Mən soyqırıma qarşıyam” yazısı olan plakat tutduğuna görə Terrorla Mübarizə Qanunu çərçivəsində saxlanılıb.
Sosial şəbəkələrdə yayılan görüntülərdə polis əməkdaşının Tunberqdən plakatı aldığı və onun oturaq aksiyanı tərk etməsini istədiyi, lakin Tunberqin bundan imtina etdiyi görünür. Polis aksiyada Tunberqlə yanaşı, binaya qırmızı boya tökən daha iki fəalı da saxlayıb.
Qeyd edək ki, “Palestine Action” qruplaşmasının səkkiz üzvü təxminən bir ildir həbsdə saxlanılır və həbs şəraitinin yaxşılaşdırılması, həmçinin təşkilata qoyulan qadağanın ləğvi tələbi ilə aclıq aksiyası keçirir. Məlumata görə, səhhətində yaranan problemlər səbəbilə üç məhbus aclığı dayandırıb, beş nəfər isə aksiyanı davam etdirir.
Böyük Britaniyanın həbsxanalar üzrə dövlət naziri Uilyam Ceyms Timpson aclıq aksiyalarının ölkə üçün yeni hal olmadığını bildirərək, ildə orta hesabla 200 məhbusun aclıq aksiyasına başladığını qeyd edib. O, hökumət üzvlərinin davam edən məhkəmə prosesləri zamanı məhbusların nümayəndələri ilə görüşməsinin qanunsuz və yolverilməz olduğunu vurğulayıb.
