BAKI,AzerVoice,Fərid Mikayılov

Tacikistan-Əfqanıstan sərhədində silahlı terror qrupunun dövlət sərhədini pozmaq cəhdinin qarşısı alınıb. Hadisə nəticəsində üç terrorçu zərərsizləşdirilib, iki tacik sərhədçisi həlak olub.

AzerVoice xəbər verir ki, Tacikistan Respublikasının Dövlət Milli Təhlükəsizlik Komitəsinin Sərhəd Qoşunlarının Mətbuat Mərkəzinin yaydığı məlumata görə, hadisə 23 dekabr 2025-ci il tarixində saat 23:30 radələrində Şəmsiddin Şohin rayonunun Kavok ərazisində, “Bağ” adlı 5 saylı sərhəd zastavasının mühafizə zonasında baş verib.

Məlumata əsasən, üç nəfər terror təşkilatı üzvü Əfqanıstan ərazisindən Tacikistan Respublikasının dövlət sərhədini qanunsuz keçib. Operativ-axtarış tədbirləri nəticəsində terrorçuların gizləndiyi yer 24 dekabr saat 11:15-də müəyyən edilib.

Tacikistan sərhədçilərinin təslim ol çağırışına tabe olmayan terrorçular silahlı müqavimət göstərərək sərhəd zastavalarından birinə hücum etməyi planlaşdırıblar. Baş verən silahlı toqquşma zamanı hər üç terrorçu zərərsizləşdirilib.

Əməliyyat zamanı hadisə yerindən M-16 tipli odlu silah, Kalaşnikov avtomatı, xarici istehsal olan səsboğucu ilə təchiz edilmiş üç tapança, 10 ədəd əl qumbarası, gecəgörmə cihazı, partlayıcı maddələr və müxtəlif hərbi sursatlar müsadirə olunub.

Toqquşma zamanı Tacikistan Dövlət Milli Təhlükəsizlik Komitəsinin Sərhəd Qoşunlarının iki hərbi qulluqçusu – Navruzbekov Zirehbon Nağizbekoviç və Qurbanov İsmətullo Qulamoviç həlak olub.

Rəsmi açıqlamada qeyd olunur ki, bu, son bir ay ərzində Əfqanıstandan Tacikistan ərazisinə yönəlmiş üçüncü silahlı hücum və terror cəhdidir. Bildirilib ki, bu hallar nəticəsində həm mülki şəxslər, həm də hərbi qulluqçular həyatlarını itiriblər.

Tacikistan tərəfi bəyan edib ki, bu faktlar Əfqanıstanda fəaliyyət göstərən Taliban hakimiyyətinin beynəlxalq öhdəliklərini yerinə yetirmədiyini, sərhəd təhlükəsizliyi və terrorla mübarizə sahəsində ciddi məsuliyyətsizlik nümayiş etdirdiyini göstərir.

Bəyanatda Tacikistan Sərhəd Qoşunlarının dövlət sərhədinin təhlükəsizliyini təmin etmək üçün tam fiziki və döyüş qabiliyyətinə malik olduğu vurğulanıb və bildirilib ki, sərhədçilər bundan sonra da terrorçu qruplara, qaçaqmalçılara və sərhəd pozuntularına qarşı qətiyyətlə cavab verəcəklər.

Hazırda sərhəddə vəziyyətin sabit olduğu, hadisə ilə bağlı istintaqın davam etdiyi bildirilib.