BAKI, AzerVoice, Fərid Mikayılov
Venesuela müxalifətinin lideri Maria Corina Maçado ölkəsinə “mümkün olan ən qısa zamanda” qayıdacağını bəyan edib və Karakasda fəaliyyət göstərən müvəqqəti rəhbərliyi sərt tənqid edib.
AzerVoice xəbər verir ki, Maria Korina Maçado ABŞ ordusunun Venesuela Prezidenti Nikolas Maduronu hakimiyyətdən uzaqlaşdırmasından sonra ilk ictimai açıqlamasını verərək geri dönmək niyyətində olduğunu bildirib.
Hazırda harada olduğu açıqlanmayan Maçado müsahibəsində danışıb.
“Venesuelaya mümkün qədər tez qayıtmağı planlaşdırıram,” – deyə o qeyd edib.
Maçado müvəqqəti prezident kimi çıxış edən Delsi Rodriqezi kəskin şəkildə tənqid edərək, onu “işgəncə, korrupsiya və narkotik alverinin əsas memarlarından biri” adlandırıb. O vurğulayıb ki, Rodriqes Venesuela cəmiyyətində legitimliyə malik deyil və xalq tərəfindən qəbul olunmur.
Müxalifət liderinin sözlərinə görə, azad və ədalətli seçkilər keçiriləcəyi təqdirdə müxalifət qüvvələri böyük üstünlüklə qalib gələcək.
“Azad və şəffaf seçkilərdə biz səslərin 90 faizindən çoxunu qazanacağıq. Buna heç bir şübhəm yoxdur” – deyə Maçado bildirib.
O, həmçinin Venesuelanı “Amerika qitəsinin enerji mərkəzinə” çevirmək, ölkəni zəiflədən cinayətkar strukturları ləğv etmək və illərdir ölkəni tərk etməyə məcbur qalan milyonlarla venesuelalını yenidən vətənə qaytarmaq niyyətində olduğunu vurğulayıb.
