BAKI, AzerVoice, Orxan Qədirzadə
Rusiya və Fransa arasında saxlanılan şəxslərin mübadiləsi həyata keçirilib. Fransa ərazisində ABŞ-ın tələbi ilə saxlanılan rusiyalı basketbolçu Daniil Kasatkin Rusiyada məhkum olunmuş fransız politoloq Loran Vinate ilə dəyişdirilib.
AzerVoice xəbər verir ki, məlumatı Rusiya Federal Təhlükəsizlik Xidmətinin İctimaiyyətlə Əlaqələr Mərkəzi yayıb. Kasatkinin vəkili Frederik Belo basketbolçunun gecə saatlarında həbsxanadan azad edildiyini, təyyarə ilə Moskvaya çatdığını təsdiqləyib.
Loran Vinate isə Kasatkinin Rusiyaya qayıtdığı eyni təyyarə ilə Fransaya göndərilib. Fransa Prezidenti Emmanuel Makron politoloqun artıq vətəninə çatdığını açıqlayıb.
Kasatkin 21 iyun 2025-ci ildə Parisin Şarl-de-Qoll hava limanında ABŞ hakimiyyətinin sorğusu əsasında saxlanılmışdı. ABŞ-da o, 2020–2022-ci illərdə zərərli proqramlardan istifadə etməklə təxminən 900 şirkətə, o cümlədən iki federal quruma qarşı kiberhücumlar həyata keçirməkdə ittiham olunan haker şəbəkəsi ilə əlaqədə şübhəli bilinirdi. Basketbolçu ittihamları rədd etmişdi.
Oktyabr ayında Paris Apellyasiya Məhkəməsi onun ABŞ-a ekstradisiyasını təsdiqləmişdi. ABŞ-da Kasatkinə 25 ilədək həbs cəzası təhlükəsi var idi.
Loran Vinate 2024-cü ilin iyununda Moskvada saxlanılıb. O, Rusiya və Mərkəzi Asiya üzrə ekspert kimi çalışıb və 2014-cü ildən Cenevrədə yerləşən beynəlxalq humanitar təşkilatla əməkdaşlıq edib. Rusiya istintaqının versiyasına görə, Vinate ölkədə hərbi fəaliyyət və səfərbərliklə bağlı məlumatlar toplayıb.
2024-cü ilin iyununda o, xarici agentlər reyestrinə daxil edilib. Oktyabrda məhkəmə Vinate-ni xarici agent öhdəliklərindən yayınmaqda təqsirli bilib və üç il azadlıqdan məhrum edib. Daha sonra ona qarşı casusluq maddəsi ilə yeni cinayət işi açılıb.
19 dekabr tarixində Rusiya Prezidenti Vladimir Putinlə birbaşa xətt zamanı fransız jurnalistin sualını cavablandıran dövlət başçısı Vinate ilə şəxsən tanış olmadığını, lakin məsələni qanun çərçivəsində araşdıracağını bildirmişdi. Daha sonra Kremlin mətbuat xidməti Rusiya və Fransa arasında bu məsələ üzrə təmasların aparıldığını təsdiqləyib.
FSB-nin məlumatına görə, mübadilədən əvvəl Prezident Putin Loran Vinate-nin əfv edilməsi barədə sərəncam imzalayıb.
