BAKI,AzerVoice, Fərid Mikayılov
ABŞ-ın Virciniya ştatı mərkəzli İran İnsan Hüquqları Aktivistləri Xəbər Agentliyi (HRANA) İranda iqtisadi problemlərə qarşı keçirilən etiraz aksiyalarında həyatını itirənlərin sayının 3 min 90-a yüksəldiyini açıqlayıb.
AzerVoice xəbər verir ki, HRANA-nın yaydığı məlumata görə, ölkənin müxtəlif bölgələrində baş verən hadisələr zamanı 2 min 55 nəfər yaralanıb, 22 min 123 nəfər isə saxlanılıb. Hesabatda zorakılıq hallarının genişmiqyaslı insan tələfatına səbəb olduğu qeyd olunub.
İran rəsmiləri indiyədək etiraz aksiyaları zamanı ölən və yaralananların ümumi sayı ilə bağlı rəsmi açıqlama verməyiblər. Bununla belə, daha əvvəl yayılan məlumatlarda, hadisələri təxribat məqsədilə yönləndirdiyi və ya terror təşkilatları ilə əlaqəli olduğu iddia edilən təxminən 3 min nəfərin saxlanıldığı bildirilmişdi.
HRANA bir gün əvvəl dərc etdiyi hesabatda ölənlərin sayının 2 min 677 nəfər olduğunu açıqlamışdı. Son rəqəmlər insan tələfatının sürətlə artdığını göstərir.
Qeyd edək ki, İranda etiraz aksiyaları 28 dekabr 2025-ci ildə milli valyutanın xarici valyutalar qarşısında kəskin dəyər itirməsi və ölkədə dərinləşən iqtisadi problemlər səbəbilə Tehran Böyük Bazarında ticarətçilərin keçirdiyi etirazlarla başlayıb. Aksiyalar qısa müddətdə ölkənin bir çox şəhərinə yayılıb.
Paytaxt Tehran şəhərində 8 yanvar tarixində etirazların şiddətlənməsindən sonra ölkə rəhbərliyi təhlükəsizlik səbəbi ilə internetə çıxışı məhdudlaşdırmışdı.
