BAKI,AzerVoice, Fərid Mikayılov
Belçika xarici işlər naziri Maksim Prevo ABŞ Prezidenti Donald Trampın Qrenlandiya üzərində “tam və mütləq nəzarət” qurmaq niyyətini kəskin tənqid edib.
AzerVoice xəbər verir ki, Davosda keçirilən Dünya İqtisadi Forumu çərçivəsində Euronewsə müsahibə verən Belçika xarici işlər naziri Maksim Prevo bildirib ki, ABŞ-ın Qrenlandiya ilə bağlı mövqeyi NATO daxilində ciddi narahatlıq yaradır və bu yanaşma qəbuledilməzdir.
Prevo vurğulayıb ki, NATO ailəsi daxilində müttəfiqlərə qarşı təzyiq və şantaj dili istifadə etmək yolverilməzdir. Onun sözlərinə görə, Vaşinqtonun Danimarkaya bağlı muxtar bölgə olan Qrenlandiya üzərində nəzarət iddiaları həm Avropa İttifaqı, həm də transatlantik münasibətlər üçün təhlükəli presedent yaradır.
ABŞ Prezidenti Donald Tramp son günlər Qrenlandiyanı ABŞ-ın nəzarətinə keçirməklə bağlı çağırışlarını gücləndirib və bu məqsədlə güc tətbiqi ehtimalını da istisna etməyib. Tramp Qrenlandiyanın ABŞ üçün “milli təhlükəsizlik baxımından vacib” olduğunu iddia edərək bölgədə Rusiya və Çin gəmilərinin fəallaşdığını bildirib.
Belçika xarici işlər naziri ABŞ-ın təhlükəsizlik narahatlıqlarını tamamilə inkar etmədiklərini qeyd etsə də, bu məsələlərin mövcud əməkdaşlıq mexanizmləri çərçivəsində həll edilə biləcəyini deyib. Prevo xatırladıb ki, ABŞ ilə Danimarka arasında imzalanmış Qrenlandiya Müdafiə Razılaşması ABŞ ordusunun bölgədə fəaliyyətinə artıq imkan verir.
“Bu razılaşma çərçivəsində gələcəkdə əlavə hərbi mövcudluq da mümkündür. Buna görə də ərazi iddiaları və təzyiq dili kimi köhnəlmiş üsullara ehtiyac yoxdur. Bu, Avropa üçün qırmızı xətdir,” – deyə nazir bildirib.
Trampın mövqeyinə baxmayaraq, Prevo yaxın günlərdə daha rasional yanaşmanın üstünlük qazanacağına ümid etdiyini vurğulayıb. Onun sözlərinə görə, Avropa tərəfi gərginliyin artmasının qarşısını almaq üçün diplomatik kanallardan istifadə etməyə davam edəcək.
Qeyd edək ki, ABŞ Prezidenti Qrenlandiya məsələsi ilə bağlı “maraqlı tərəflərlə” danışıqlara açıq olduğunu açıqlayıb. Avropa İttifaqı liderləri isə yaranmış vəziyyəti müzakirə etmək üçün Brüsseldə fövqəladə zirvə toplantısı keçirməyə hazırlaşır.
