BAKI,AzerVoice, Fərid Mikayılov
Latviya və Estoniya rəhbərliyi Avropa İttifaqını Rusiya ilə birbaşa danışıqlara başlamağa çağırıb və bu məqsədlə Aİ-nin xüsusi nümayəndəsinin təyin olunmasını təklif edib.
AzerVoice xəbər verir ki, Latviyanın Baş naziri Evika Siliņa və Estoniya Prezidenti Alar Karis Avropa İttifaqının Rusiya ilə dialoq prosesində birbaşa iştirak etməsinin vacibliyini vurğulayıblar.
Latviyanın Baş naziri bildirib ki, Ukrayna artıq danışıqlara başlayıbsa, Avropa da bu prosesdə masada təmsil olunmalıdır. O, xüsusi nümayəndə roluna özünün də hazır olduğunu desə də, Almaniya, Fransa və Böyük Britaniya liderlərinin, eləcə də Polşanın Baş naziri Donald Tusk kimi fiqurların bu prosesdə iştirakının daha məqsədəuyğun olacağını qeyd edib.
Estoniya Prezidenti Alar Karis isə Avropanın dialoqa başlamaqda gecikdiyini bildirib. Onun sözlərinə görə, bir neçə il əvvəl danışıqlardan imtina mövqeyi mövcud idisə, indi Avropanın prosesdən kənarda qalması narahatlıq doğurur. Karis xüsusi nümayəndənin həm Rusiya, həm də Ukrayna tərəfindən etimad göstərilən ölkədən seçilməsinin vacibliyini vurğulayıb.
Fransanın xarici işlər naziri Jan-Noel Barro fevralın 1-də bildirib ki, Avropa ölkələri öz maraqlarını qorumaq üçün Rusiya ilə birbaşa ünsiyyət kanallarına malik olmalıdır. O, bu məsuliyyətin başqa tərəflərə ötürülməməli olduğunu qeyd edib.
Finlandiyanın Baş naziri Petteri Orpo Rusiya Prezidenti ilə görüşə hazır olduğunu desə də, hazırkı mərhələdə bunun üçün vaxtın uyğun olmadığını bildirib. Onun fikrincə, Avropa-Rusiya münasibətlərində mövcud vəziyyət əbədi davam edə bilməz və sülh üçün dialoq qaçılmaz olacaq.
Finlandiya Prezidenti Alexander Stubb da oxşar mövqe ifadə edərək, müəyyən mərhələdə Avropa ilə Rusiya arasında dialoqun mütləq bərpa olunacağını qeyd edib.
