BAKI, VOA, Orxan Qədirzadə

ABŞ prezidenti Donald Tramp bildirib ki, İranın yüksək dərəcədə zənginləşdirilmiş uran ehtiyatlarını nəzarətə götürmək məqsədilə ABŞ qoşunlarının ölkəyə göndərilməsi ilə bağlı hələlik heç bir qərar qəbul edilməyib.

VOA xəbər verir ki, Tramp bu barədə ABŞ və İsrail arasında İranın nüvə materiallarının ələ keçirilməsi üçün xüsusi təyinatlı qüvvələrin göndərilməsi imkanlarının müzakirə edildiyi barədə yayılan məlumatlara münasibət bildirərkən danışıb.

ABŞ prezidenti qeyd edib ki, bu məsələ ilə bağlı hər hansı qərar verilməyib və belə bir addımın atılması hazırda gündəmdə deyil.

İranın nüvə proqramı ilə bağlı uzun müddətdir davam edən mübahisə son günlərdə hərbi qarşıdurmaya çevrilib. ABŞ və İsrailin İrana qarşı hava zərbələri endirməsindən sonra Tehran regionun müxtəlif nöqtələrində cavab hücumları həyata keçirib.

Tramp daha əvvəl bildirib ki, İran ötən ilin iyun ayında ABŞ tərəfindən həyata keçirilən zərbələr nəticəsində ciddi zərbə alan nüvə proqramını yenidən bərpa etməyə başlayıb. Lakin bu iddialar rəsmi Tehran tərəfindən rədd edilir.

İran rəsmiləri ölkənin uranın zənginləşdirilməsi fəaliyyətinin yalnız mülki məqsədlərə xidmət etdiyini və nüvə silahı əldə etmək niyyətlərinin olmadığını bəyan edirlər.