BAKI, VOA, Orxan Qədirzadə

ABŞ administrasiyası Yaxın Şərqdə hərbi mövcudluğunu gücləndirmək üçün regiona əlavə qüvvələr göndərir.

VOA xəbər verir ki, ABŞ mətbuatının məlumatına görə, Vaşinqton administrasiyası Yaxın Şərqdəki hərbi mövcudluğunu artırmaq məqsədilə regiona yeni hərbi qüvvələr göndərməyə başlayıb.

ABŞ rəsmilərinə istinadən yayılan məlumatlarda bildirilib ki, bölgəyə təxminən 5 min hərbçidən ibarət amfibiya tapşırıq qrupu və dəniz piyadaları göndəriləcək. Hərbi qüvvələrin göndərilməsi ABŞ Mərkəzi Komandanlığının müraciəti əsasında həyata keçirilir.

Məlumata görə, ABŞ müdafiə naziri Pit Heqseth Yaxın Şərqə dəniz piyadalarının kəşfiyyat bölməsinin göndərilməsinə razılıq verib. Bu addım İran ətrafında artan gərginlik fonunda regionda əməliyyat hazırlığını gücləndirmək məqsədi daşıyır.

Mediada yayılan xəbərlərdə qeyd olunur ki, bu addım yalnız şəxsi heyətlə məhdudlaşmır. ABŞ ordusu bölgəyə əlavə hərbi gəmilər də yönləndirib.

Bildirilir ki, İranla bağlı gərginliyin davam etdiyi bir vaxtda Vaşinqton regionda hərbi mövcudluğunu genişləndirir.

Məlumatlara görə, ABŞ eyni zamanda İsraillə birlikdə həyata keçirilən hərbi əməliyyatların ikinci həftəsində 160-dan çox hərbi yanacaq doldurma təyyarəsini ABŞ Mərkəzi Komandanlığı və Avropa Komandanlığının məsuliyyət zonasına yerləşdirib.

Açıq mənbələrə əsasən, 17 ədəd KC-46A tipli yanacaq doldurma təyyarəsi və 62 ədəd KC-135 tipli təyyarə əməliyyat bölgəsinə yaxın hərbi bazalara yerləşdirilib. Onların bir hissəsinin İngiltərə və ABŞ-ın birgə istifadə etdiyi Diego Qarsiya hərbi bazasında, digərlərinin isə regiondakı müxtəlif hava bazalarında yerləşdirildiyi bildirilir.

Bununla yanaşı, bu təyyarələrin bir hissəsinin İsraildə yerləşən Ben Qurion hava limanında və Avropanın cənubunda yerləşən hərbi bazalarda yerləşdirildiyi barədə məlumatlar yayılıb.