BAKI, VOA, Orxan Qədirzadə

İtaliyanın Baş naziri Corcia Meloni məhkəmə sistemində islahatların aparılması ilə bağlı keçirilən referendumda məğlub olduğunu etiraf edib. Bununla belə, Baş nazir hökumət rəhbəri postundan istefa verməyəcəyini qəti şəkildə bəyan edib.

VOA xəbər verir ki, Meloni "X" sosial şəbəkəsində paylaşdığı video müraciətində italyan xalqının qərarına hörmətlə yanaşdıqlarını bildirib. O, referendumun nəticəsini "İtaliyanı müasirləşdirmək üçün itirilmiş fürsət" kimi xarakterizə edib. Baş nazir vurğulayıb ki, bu nəticə hökumətin millətin naminə çalışmaq və ona həvalə edilmiş mandatı yerinə yetirmək əzmini dəyişməyəcək.

Meloninin sağçı hökuməti İtaliya konstitusiyasına dəyişiklik edərək hakimlər və prokurorların rollarını bir-birindən ayırmağı, həmçinin onların nəzarət orqanını yenidən qurmağı planlaşdırırdı. Baş nazir bu planın məhkəmə sistemində qərəzsizliyi təmin etmək və səmərəliliyi artırmaq üçün zəruri olduğunu iddia edib. Lakin müxalifət və mərkəz-solçu Demokratik Partiyasının lideri Elli Şleyn bu təklifi məhkəmə hakimiyyətinin müstəqilliyini zəiflədən və siyasi güc toplamağa xidmət edən bir addım kimi kəskin tənqid ediblər.

Referendum kampaniyası kifayət qədər gərgin və sərt keçib. Hökumət nümayəndələri, xüsusilə Ədliyyə naziri Karlo Nordio məhkəmə sistemini sərt tənqid edərək, islahatın sistemdəki "para-mafiya mexanizmlərini" düzəldəcəyini bildirib. Təklif olunan ən mübahisəli məqamlardan biri Məhkəmə Hakimiyyəti Ali Şurasının (CSM) iki ayrı şuraya bölünməsi və intizam məhkəməsi üzvlərinin artıq səsvermə yolu ilə deyil, püşkatma vasitəsilə seçilməsi olub. İtaliya Milli Magistratlar Assosiasiyasının üzvlərinin 80 faizindən çoxu bu islahatlara etiraz olaraq ötən il birgünlük tətil keçirib.

İtaliya xalqının bu "yox" qərarı, Meloninin məhkəmə sistemini köklü şəkildə dəyişmək cəhdlərini dayandırsa da, hökumətin gələcək fəaliyyət kursuna ciddi təsir göstərməyəcəyi gözlənilir.