BAKI, VOA, Orxan Qədirzadə
Kolumbiya Hərbi Hava Qüvvələrinə məxsus "C-130H Hercules" tipli hərbi nəqliyyat təyyarəsi ölkənin cənubunda qəzaya uğrayıb. İlkin məlumatlara görə, qəza zamanı təyyarənin göyərtəsində müxtəlif rütbəli 110-dan çox hərbi personalın olduğu bildirilib.
VOA xəbər verir ki, hadisə Putumayo idarəetmə bölgəsinin Puerto Leguizamo qəsəbəsi yaxınlığında baş verib. "FAC-10016" qeydiyyat nömrəli təyyarə uçuşdan qısa müddət sonra yaşayış məntəqəsindən təxminən 3 kilometr məsafədə qəzaya uğrayıb.
Hadisə yerindən daxil olan ilk məlumatlara görə, indiyədək 57 hərbçini sağ xilas etmək mümkün olub. Kolumbiyanın müdafiə naziri Pedro Sançez "X" sosial media platformasında etdiyi paylaşımda qəza bölgəsinə çoxlu sayda mülki müdafiə və axtarış-xilasetmə qruplarının cəlb edildiyini bəyan edib. Nazir hərbi bölmələrin artıq hadisə yerində olduğunu, lakin dəqiq itki sayı və qəzanın səbəblərinin hələlik müəyyən edilmədiyini vurğulayıb.
Müdafiə naziri Sançez hadisə ilə bağlı genişmiqyaslı təhqiqatın başladıldığını bildirərək, rəsmi məlumatlar dəqiqləşənə qədər spekulyasiyalardan qaçınmağa çağırıb. O, baş verən qəzanı ölkə üçün "dərin ağrı verən bir hadisə" kimi xarakterizə edib və kədərli ailələrin yanında olduqlarını qeyd edib. Sosial mediada yayılan görüntülərdə təyyarənin düşdüyü ərazidən qara tüstü və alovların yüksəldiyi aydın şəkildə əks olunub.
