BAKI,VOA, Fərid Mikayılov

Fransanın "CMA CGM" gəmiçilik şirkəti şənbə günü Hörmüz boğazından keçən gəmilərindən birinin xəbərdarlıq atəşinə məruz qaldığını təsdiqləyib.

VOA xəbər verir ki, bazar günü verilən rəsmi bəyanatda gəmidəki bütün heyət üzvlərinin təhlükəsizlikdə olduğu və heç bir xəsarət alanın olmadığı bildirilib.

Şirkət sözügedən gəminin Fransa bayrağı altında üzən "CMA CGM Everglade" konteyner gəmisi olduğunu açıqlayıb.

Beynəlxalq Dəniz Təşkilatının (IMO) "Agence France-Presse" (AFP) tərəfindən yayılan məlumatına görə, insident Omanın Kumzar bölgəsinin şimalında baş verib. Atəş nəticəsində gəmiyə zərər dəydiyi bildirilsə də, zədənin miqyası barədə ətraflı məlumat verilməyib. Ərazidə hər hansı ekoloji çirklənmə qeydə alınmayıb.

Şirkətin bəyanatında qeyd olunur ki, gəmi hələ də istismar vəziyyətindədir və dəyən zərər yalnız bəzi konteynerlərlə məhdudlaşır.

Məlumata görə, "Everglade" də daxil olmaqla bir neçə gəmi, Tehranın Hörmüz boğazının yenidən açılması ilə bağlı qərarını geri oxumasından sonra İran qüvvələri tərəfindən atəşə tutulduqlarını bildiriblər.

İran rəsmiləri su yolunun yenidən bağlanmasını ABŞ-ın ölkə limanlarına tətbiq etdiyi blokadaya cavab olaraq atılan qisas addımı kimi qiymətləndiriblər.