BAKI,VOA Orxan Qədirzadə
ABŞ dövlət katibi Marco Rubio Vaşinqton ilə Vatikan arasında artan gərginliyi azaltmaq məqsədilə Romaya rəsmi səfərə hazırlaşır.
VOA xəbər verir ki, Rubio bu həftə Roma şəhərinə səfər edərək cümə axşamı Papa XIV Leo ilə görüş keçirəcək. Səfər çərçivəsində o, cümə günü İtaliyanın Baş naziri Giorgia Meloni və xarici işlər naziri Antonio Tajani ilə də danışıqlar aparacaq.
Məlumata görə, səfərin əsas məqsədi ABŞ prezidenti Donald Trump ilə Papa XIV Leo arasında yaranmış açıq və qeyri-adi gərginliyi yumşaltmaqdır. Bildirilir ki, tərəflər arasında münasibətlər xüsusilə miqrasiya siyasəti və Yaxın Şərqdə baş verən hadisələr fonunda pisləşib.
Papa XIV Leo daha əvvəl Tramp administrasiyasının miqrasiya əleyhinə siyasətini tənqid edib, həmçinin ABŞ-ın Kuba ilə bağlı enerji məhdudiyyətləri və İran ətrafında hərbi gərginliklə bağlı narahatlığını ifadə edib. O, ABŞ və İsrailin İrana qarşı hərbi fəaliyyətini də sərt şəkildə tənqid edib.
Öz növbəsində, Tramp sosial şəbəkələrdə Papaya qarşı bir neçə dəfə sərt ifadələr işlədib və onu “dəhşətli” adlandırıb. Buna cavab olaraq Papa XIV Leo bildirib ki, o, mövqeyini etik və mənəvi prinsiplər əsasında formalaşdırır və şəxsi qarşıdurmaya girmək niyyətində deyil.
ABŞ Dövlət Departamentinin məlumatına əsasən, Rubio ilə Papa XIV Leo arasında keçiriləcək görüşdə əsas diqqət Yaxın Şərqdəki vəziyyətə və tərəflər arasında ortaq maraqlara yönələcək.
Rubionun İtaliya rəsmiləri ilə görüşlərində isə təhlükəsizlik sahəsində əməkdaşlıq və strateji koordinasiya məsələlərinin müzakirə ediləcəyi gözlənilir.
Qeyd edək ki, bu təmaslar ABŞ-ın NATO müttəfiqlərinə yönəlmiş son tənqidləri fonunda baş tutur. Tramp alyans üzvlərini İranla bağlı münaqişədə kifayət qədər dəstək verməməkdə ittiham edib.
Bununla yanaşı, ABŞ-ın Almaniyadan 5 min hərbçini çıxarmaq planı və İspaniya ilə İtaliyadan da qoşunların azaldılması ehtimalı regionda əlavə siyasi gərginlik yaradır. İtaliya hökuməti isə ABŞ qoşunlarının ölkədən çıxarılmasına qarşı olduğunu açıqlayıb.
