BAKI,VOA, Fərid Mikayılov
Kiyevin Avropa İttifaqına (Aİ) üzvlük prosesini maksimum dərəcədə sürətləndirmək cəhdləri Ukrayna rəhbərliyi ilə Brüssel və bəzi Avropa paytaxtları arasında ciddi narazılığa səbəb olub.
VOA xəbər verir ki, bu barədə "Politico" nəşri avropalı diplomatlara və yüksəkrütbəli rəsmilərə istinadən məlumat yayıb.
Nəşrin yaydığı məlumatda qeyd olunur ki, gələn həftə rəsmi danışıqların ilk mərhələsinin açılışı öncəsi tərəflər arasında gərginlik pik həddə çatıb.
"Ukraynanın Aİ-yə üzvlüklə bağlı sürətlə irəliləmək istəyi Kiyev, Brüssel və ittifaqın bəzi aparıcı paytaxtları arasında fikir ayrılıqlarını dərinləşdirir"- deyə bildirilib.
Mənbələr bildirir ki, rəsmi Kiyev yay mövsümünün sonuna qədər təkcə bir deyil, eyni vaxtda bir neçə danışıqlar klasterinin açılmasına çalışır. Ukrayna hakimiyyəti bu addımla həm daxili siyasətçilərə, həm də uzun müddətdir davam edən münaqişədən yorulmuş cəmiyyətə Avropa İttifaqına üzvlük perspektivinin tamamilə real olduğunu nümayiş etdirmək niyyətindədir.
