BAKI,VOA,Yusif Şərifzadə
ABŞ Prezidenti Donald Tramp Hörmüz boğazında gəmi hərəkətinin bərpa olunmağa başladığını bildirib.
VOA xəbər verir ki, Tramp sosial şəbəkə hesabında paylaşdığı açıqlamada artıq bir sıra gəmilərin boğazdan hərəkət etdiyini və onların əksəriyyətinin neft yüklü olduğunu qeyd edib.
Onun sözlərinə görə, gəmilər boğazda müəyyən edilmiş təhlükəsiz dəniz marşrutundan istifadə edirlər.
ABŞ prezidenti həmin marşrutun tam təhlükəsiz, etibarlı və istifadəyə yararlı vəziyyətdə olduğunu vurğulayıb.
Tramp bildirib ki, hazırda hərəkət əsasən "Cənub dəhlizi" adlandırdığı istiqamət üzrə həyata keçirilir.
O əlavə edib ki, bölgədə istifadə oluna biləcək digər hərəkət marşrutları da mövcuddur.
Lakin ABŞ lideri həmin alternativ istiqamətlərlə bağlı əlavə məlumat verməyib.
Hörmüz boğazı dünya enerji ticarəti üçün strateji əhəmiyyət daşıyan əsas dəniz yollarından biri hesab olunur.
