BAKI,VOA, Fərid Mikayılov
Kanada Baş naziri Mark Karni ABŞ və İran arasında əldə olunmuş yeni memorandum layihəsini regional təhlükəsizlik və qlobal iqtisadiyyat üçün "böyük dönüş nöqtəsi" adlandırıb.
VOA xəbər verir ki, Karni, rəsmi Vaşinqton və Tehran arasında əldə olunan sənədin mətnini şəxsən nəzərdən keçirdiyini və bu sazişi "yaxşı strukturlaşdırılmış" və "müsbət" addım kimi "mütləq şəkildə" dəstəklədiyini bəyan edib.
"Biz əldə olunmuş bu razılaşmadan olduqca məmnun və şadıq. Bu, regionda və dünyada şərtləri kökündən dəyişdirən bir dönüş nöqtəsidir. Sənəd ilk növbədə İranın nüvə silahına sahib olmamasını təmin etmək üçün möhkəm zəmin yaradır. Eyni zamanda, zaman keçdikcə region iqtisadiyyatlarının yenidən qlobal sistemə inteqrasiyası və bu gün sammitdə ətraflı müzakirə etdiyimiz Livan böhranının həlli üçün əlverişli fundamental baza formalaşdırır. Ona görə də hər mənada müsbət prosesdir"- deyə Karni bildirib.
Karni həmçinin vurğulayıb ki, sözügedən memorandum qarşıdakı aylarda öz öhdəliklərini yerinə yetirəcəyi təqdirdə İrana "böyük maliyyə stimulları və iqtisadi imkanlar" vəd edir.
Kanadanın Baş naziri Tehranın üzərinə götürməli olduğu əsas kritik öhdəliklər sırasına Hürmüz boğazının gəmiçilik üçün tamamilə açılmasını və zənginləşdirilmiş uranın ölkə xaricinə transferi ilə bağlı aparılacaq danışıqları daxil edib.
