BAKI,VOA,Yusif Şərifzadə
İsrail ilə Hizbullah arasında yeni atəşkəs razılaşmasının qüvvəyə minməsinə baxmayaraq, Livanın cənubunda hücumların davam etdiyi bildirilir.
VOA xəbər verir ki, yerli vaxtla saat 16:00-da qüvvəyə minməsi nəzərdə tutulan atəşkəsdən sonra Livanın cənubunda azı 12 hava zərbəsi və artilleriya atəşi qeydə alınıb. Hücumlar əsasən son günlər döyüşlərin mərkəzinə çevrilən bölgələrdə həyata keçirilib.
Körfəz ölkələrindən olan bir diplomatın sözlərinə görə, atəşkəs razılaşması Qətər, ABŞ və İranın vasitəçiliyi ilə əldə olunub. Məqsəd Livandakı gərginliyin daha da artmasının qarşısını almaq və ABŞ ilə İran arasında qüvvədə olan razılaşmanın zərər görməsinə imkan verməmək olub.
Lakin atəşkəsin qüvvəyə minməsindən sonra da hərbi əməliyyatların davam etməsi razılaşmanın icrası ilə bağlı suallar yaradıb.
Livanın Səhiyyə Nazirliyinin məlumatına görə, gecə yarısından etibarən İsrail hücumları nəticəsində azı 47 nəfər həlak olub, 97 nəfər yaralanıb.
Nazirlik bildirib ki, bu rəqəmlərə atəşkəsdən sonra baş verən bütün hücumların qurbanları daxil olmaya bilər.
