BAKI,VOA,Yusif Şərifzadə
ABŞ Prezidenti Donald Tramp İsrailin Baş naziri Benyamin Netanyahunun siyasi gələcəyi ilə bağlı məqaləni sosial şəbəkə hesabında paylaşaraq diqqət çəkib.
VOA xəbər verir ki, paylaşımda Trampın İsrail siyasətinə və Netanyahunun yenidən seçilmə perspektivlərinə təsir imkanlarından bəhs olunur.
Məqalədə Donald Trampın İsrail mediasına verdiyi müsahibədən sitat gətirilərək onun gələcək seçkilərdə kimi dəstəkləyəcəyi məsələsinə toxunulub.
"Namizədlərin kim olacağına baxmalı olacağam", - deyə Tramp bildirib.
Məqalədə qeyd olunur ki, Tramp Benyamin Netanyahunu dəstəkləməsinin daha ehtimal olunan variant olduğunu desə də, Naftali Bennett və Qadi Eyzenkot kimi digər mümkün namizədləri də qiymətləndirə biləcəyini vurğulayıb.
Məlumata görə, paylaşım ABŞ və İsrail arasında Livandakı hərbi əməliyyatlarla bağlı fikir ayrılıqlarının artdığı dövrə təsadüf edir.
Donald Tramp son aylarda İsrail hökumətinin hərbi strategiyasını bir neçə dəfə tənqid edib. O, xüsusilə İranla sülh memorandumunun imzalanması ərəfəsində Beyrutun bombalanmasını sərt şəkildə qiymətləndirib.
Bəzi Amerika KİV-lərinin məlumatına görə, Ağ ev İranla münaqişənin diplomatik yolla həllinə çalışdığı halda, Vaşinqton və Təl-Əviv arasında münasibətlərdə gərginlik artıb.
Məqalədə həmçinin Trampın Netanyahuya Livanda daha ehtiyatlı davranmağı tövsiyə etdiyi və hərbi əməliyyatların miqyasından narazı qaldığı qeyd olunur.
