BAKI,VOA, Fərid Mikayılov

ABŞ Sahil Mühafizəsinə məxsus hərbi helikopter Alyaska ştatının Sitka şəhəri yaxınlığındakı Harbor dağı ərazisində təlim uçuşu zamanı qəzaya uğrayıb.

VOA xəbər verir ki, qəza "MH-60 Jayhawk" modelli axtarış-xilasetmə helikopterinin növbəti planlı təlim missiyasını yerinə yetirdiyi zaman baş verib.

Hadisə zamanı helikopterin göyərtəsində olan 4 nəfərlik heyət üzvünün hər biri şans əsəri qəzadan sağ qurtulmağı bacarıb.

Alyaska Arktika Regional Komandanlığından verilən bəyanatda bildirilir ki, qəza barədə ilkin siqnal heyət üzvlərinin fərdi lokator mayakının aktivləşməsi nəticəsində daxil olub. Hadisə yerinə dərhal cəlb olunan Sitka Yanğından Mühafizə və Xilasetmə qrupları yaralı hərbçiləri təxliyə edərək yaxınlıqdakı "Mount Edgecumbe" Tibb Mərkəzinə yerləşdiriblər.

Həkimlərin hesabatına əsasən, heyət üzvlərinin xəsarətləri yüngüldür və həyatları üçün heç bir təhlükə mövcud deyil. Alyaska rəsmiləri hadisə ilə bağlı hər hansı can itkisinin qeydə alınmadığını təsdiqləyiblər. Faktla bağlı hərbi aviasiya mütəxəssislərinin iştirakı ilə xüsusi komissiya yaradılıb və qəzanın başvermə səbəblərini müəyyənləşdirmək üçün rəsmi təhqiqat başladılıb. Təhlükəsizlik tədbirləri çərçivəsində Harbor dağına gedən avtomobil və piyada yolları müvəqqəti olaraq bağlanıb.