BAKI, VOA
ABŞ Prezidenti Donald Tramp 2024-cü ildən İranda saxlanılan ABŞ vətəndaşının azad edildiyini açıqlayıb.
VOA xəbər verir ki, Trampın sözlərinə görə, qadın artıq İranı tərk edib və təhlükəsiz yerdədir.
ABŞ Prezidenti Truth Social platformasında paylaşdığı açıqlamada bildirib ki, ABŞ vətəndaşı 2024-cü ilin dekabrında qanunsuz saxlanılmışdı. O qeyd edib ki, İranın qadının ölkəni tərk etməsinə icazə verməsini "xoşməramlı addım" kimi qiymətləndirir.
"İran 2024-cü ilin dekabrında qanunsuz saxlanılan ABŞ vətəndaşının ölkəni tərk etməsinə icazə verib. O, hazırda İran hüdudlarından kənarda təhlükəsiz yerdədir və vəziyyəti yaxşıdır. ABŞ İranın bu xoşməramlı addımını yüksək qiymətləndirir", – deyə Tramp bildirib.
ABŞ vətəndaşlarının hüquqlarını müdafiə edən vəkil Cared Genserin sözlərinə görə, azad edilən şəxsin Dena Karari olduğu müəyyənləşdirilib. O bildirib ki, Karari fiziki həbsdə saxlanılmasa da, İranda ölkədən çıxışına qadağa qoyulmuşdu.
Genser qeyd edib ki, İranın Kəşfiyyat Nazirliyi Dena Kararini ABŞ-də fəaliyyət göstərən Children of Mehr Foundation qeyri-kommersiya təşkilatı ilə əməkdaşlığına görə dəfələrlə dindirib. Təşkilatın İranda aztəminatlı ailələrin uşaqlarına özəl sponsorların dəstəyi ilə yardım göstərdiyi bildirilib.
Bununla yanaşı, ABŞ Dövlət Departamentinin məlumatına əsasən, hazırda İranda daha beş ABŞ vətəndaşı saxlanılır. Onların arasında Rza Vəlizadə və Kamran Hekmati də var. Vaşinqton bu şəxslərin qanunsuz saxlanıldığını bəyan edib.
