BAKI,VOA,Yusif Şərifzadə
Belçikanın federal hökuməti işğal altındakı Fələstin ərazilərində istehsal olunan məhsulların ölkəyə idxalını qadağan edən qərarı da əhatə edən yeni tədbirlər paketini təsdiqləyib.
VOA xəbər verir ki, idxal qadağası İsrailin Qəzza zolağında həyata keçirdiyi hərbi əməliyyatlara cavab olaraq Belçika hökumətinin ötən il əldə etdiyi siyasi razılaşmanın tərkib hissəsi kimi qəbul olunub.
Məlumata görə, qərar işğal altındakı Fələstin ərazilərindən gətirilən malların Belçika bazarına daxil olmasının qarşısını almağı nəzərdə tutur.
Bununla belə, Belçikanın Belga xəbər agentliyi bildirir ki, qadağanın praktiki icra mexanizmi və nəzarət prosedurları hələ tam müəyyənləşdirilməyib.
Federal hökumətin yaxın aylarda qərarın tətbiqi qaydalarını, hansı məhsulların qadağa siyahısına daxil ediləcəyini və gömrük nəzarətinin necə həyata keçiriləcəyini açıqlaması gözlənilir.
Belçikanın qərarı Avropa ölkələrinin işğal altındakı Fələstin ərazilərində istehsal olunan məhsullarla bağlı siyasətini daha da sərtləşdirdiyini göstərən növbəti addım kimi qiymətləndirilir.
