BAKI,VOA Orxan Qədirzadə
Braziliya xarici işlər naziri Mauro Vieyra Argentina Prezidenti Xavyer Mileynin Braziliya Prezidenti Luiz İnasio Lula da Silva və Ali Məhkəmənin hakimi Aleşandre de Moraes barədə səsləndirdiyi fikirləri iki ölkə münasibətlərində "görünməmiş təxribat" kimi qiymətləndirib.
Argentina mətbuatına danışan Vieyra bildirib ki, Miley Braziliyaya rəsmi dövlət səfəri üçün deyil, San-Pauloda keçirilən Liberal Partiyanın tədbirində iştirak etmək məqsədilə şəxsi səfər edib.
Nazirin sözlərinə görə, Mileyin çıxışı təkcə Prezident Lula da Silva və məhkəmə hakimiyyətini deyil, həm də Braziliyanın demokratik institutlarını və xalqını hədəf alıb.
"Bu, 200 ildən artıq ikitərəfli münasibətlər tarixində görünməmiş təxribatdır. Onun açıqlamaları ölkəmizin daxili işlərinə müdaxilə xarakteri daşıyır və demokratik təsisatlarımızı təhqir edir", – deyə Vieyra vurğulayıb.
Nazir əlavə edib ki, Mileyin bəyanatları iki ölkə arasındakı münasibətlərə mənfi təsir göstərib.
"Prezident Lula da Silvanın da dediyi kimi, heç kim yalanlarla Braziliyanı məğlub edə bilməz", – deyə o bildirib.
Braziliyanın maliyyə naziri Dario Duriqan da Mileyi sərt tənqid edib. O, Argentina iqtisadiyyatının ağır vəziyyətdə olduğunu deyərək Mileyi "təlxək" adlandırıb.
Nazirin sözlərinə görə, Argentina ölkə riski, dövlət borcu və inflyasiya baxımından ciddi problemlərlə üzləşdiyi halda, Miley diqqəti daxili problemlərdən yayındırmağa çalışır.
Gərginliyə səbəb nə olub?
Xavyer Miley iyulun 26-da San-Paulodakı Pakaembu stadionunda keçirilən Liberal Partiyanın qurultayında çıxış edərək Braziliyanın sabiq Prezidenti Jair Bolsonaroya dəstəyini ifadə edib.
O, Bolsonaro barəsində çıxarılan ev dustaqlığı qərarını "qanunsuz" adlandırıb və Prezident Lula da Silva ilə hakim Aleşandre de Moraesi sərt tənqid edib.
Miley bildirib ki, Lula həbsdə olduğu dövrdə xarici liderləri qəbul edə bildiyi halda, Braziliya məhkəməsi onun ev dustaqlığında saxlanılan Bolsonaro ilə görüşməsinə icazə verməyib.
Bu açıqlamalardan sonra Braziliya hökuməti Buenos-Ayresdəki səfirini məsləhətləşmələr üçün geri çağıraraq diplomatik etirazını ifadə edib.
