BAKI,VOA, Fərid Mikayılov
Yaponiyanın cənubunda yerləşən Kumamoto prefekturası sahillərində 7,1 bal gücündə zəlzələ baş verib. Yeraltı təkanlardan sonra bölgə üçün sunami təhlükəsi ilə bağlı xəbərdarlıq edilib.
VOA xəbər verir ki, zəlzələnin maqnitudası 7,1, ocağı isə 10 kilometr dərinlikdə yerləşib.
Dövlət televiziyası NHK bildirib ki, ilkin məlumata görə, təbii fəlakət nəticəsində həlak olan və ya xəsarət alan yoxdur.
Yeraltı təkanların Kumamoto prefekturasının Yatsuşiro, Uto və Maşiki rayonlarında da güclü hiss olunduğu qeyd edilib.
NHK-nin məlumatına görə, zəlzələdən sonra Kumamoto sahillərində yerləşən Yatsuşiro dənizi ətrafı üçün sunami təhlükəsi ilə bağlı xəbərdarlıq edilib. Aidiyyəti qurumlar sahilyanı ərazilərdə yaşayan sakinləri rəsmi göstərişlərə əməl etməyə çağırıblar.
