İsrail ordusu Qəzzadakı əməliyyatın nəticələrini açıqlayıb

İsrail ordusu Deyr əl-Bələhdə keçirilən əməliyyatda "Fələstin İslami Cihadı"nın komandiri olduğunu bildirdiyi Mahmud Fətairin öldürüldüyünü iddia edib. Ordunun məlumatına görə, o, 2023-cü il oktyabrın 7-də İsrailə daxil olan silahlılar arasında olub. İsrail Fətairi israilli vətəndaş Rom Braslavskinin girov saxlanılmasında iştirak etməkdə də ittiham edir. Bu iddiaları təsdiqləyən hər hansı sübut açıqlanmayıb. Hadisə ilə bağlı hərəkat tərəfindən hələlik rəsmi açıqlama verilməyib. Məlumat yalnız İsrail ordusunun bəyanatına əsaslanır.

3 Avqust 2026 20:54

BAKI,VOA,Yusif Şərifzadə

İsrail ordusu Qəzza zolağının mərkəzində yerləşən Deyr əl-Bələh bölgəsində həyata keçirilən əməliyyat zamanı "Fələstin İslami Cihadı" hərəkatının komandiri olduğunu bildirdiyi Mahmud Fətairin öldürüldüyünü açıqlayıb.

VOA xəbər verir ki, İsrail ordusunun yaydığı bəyanatda Mahmud Fətairin həftəsonu keçirilən əməliyyat zamanı zərərsizləşdirildiyi iddia olunur.

Ordunun açıqlamasında heç bir sübut təqdim edilmədən Fətairin 2023-cü il oktyabrın 7-də İsrail ərazisinə daxil olduğu və həmin hücumlarda iştirak etdiyi irəli sürülüb.

İsrail tərəfi həmçinin onu israilli vətəndaş Rom Braslavskinin girov saxlanılmasında iştirak etməkdə ittiham edib.

İsrail ordusu bu iddiaları təsdiqləyən hər hansı sübut və ya əlavə məlumat təqdim etməyib.