BAKI,VOA,Yusif Şərifzadə

Hörmüz boğazında beynəlxalq gəmiçiliyin təhlükəsizliyini təmin etmək məqsədilə Avropa ölkələrinin dəniz missiyası yaratmaq təşəbbüsü hələlik irəliləyiş əldə etməyib.

VOA xəbər verir ki, ABŞ bu ideyanı ilk dəfə mart ayında irəli sürərək müttəfiqlərini, eləcə də Çini boğazda təhlükəsizliyi təmin edəcək beynəlxalq dəniz koalisiyasına hərbi gəmilər göndərməyə çağırmışdı.

Lakin əksər ölkələr bu təklifə ehtiyatla yanaşıb və ya mövqelərini açıqlamaqdan çəkiniblər. Böyük Britaniya və Fransa isə təşəbbüsdə iştirak imkanını açıq saxlayıblar.

ABŞ rəsmiləri İranla müharibənin uzanması fonunda dəniz koalisiyası ideyasını fəal şəkildə gündəmdə saxlamağa davam ediblər.

Prezident Donald Tramp isə Vaşinqtona kifayət qədər dəstək vermədiklərini əsas gətirərək ABŞ-ın bəzi müttəfiqlərini açıq şəkildə tənqid edib.

Aprelin ortalarında Böyük Britaniyanın o vaxtkı baş naziri Kir Starmer Böyük Britaniya və Fransanın Hörmüz boğazında gəmiçiliyin təhlükəsizliyini təmin etmək üçün beynəlxalq missiyaya rəhbərlik etməyi planlaşdırdıqlarını açıqlayıb.

Starmer bildirib ki, nəzərdə tutulan missiya "tamamilə dinc və müdafiə xarakterli" olacaq.