BAKI,VOA Orxan Qədirzadə
Ekvador Kəşfiyyat Xidmətinin rəhbəri Mişel Sensi Kontogi, həyat yoldaşı və 4 ABŞ vətəndaşı Keniyada helikopter qəzasında həlak olub. Qəzada helikopterin keniyalı pilotu da həyatını itirib.
Hadisə çərşənbə günü Keniyanın mərkəzindəki Samburu bölgəsində baş verib. Ölən 7 nəfərin turistik məqsədlə həyata keçirilən uçuşda olduğu bildirilib.
44 yaşlı Sensi Kontogi 2024-cü ildə Ekvadorun kəşfiyyat rəhbəri təyin edilmişdi və Prezident Daniel Noboa ilə yaxın münasibətləri ilə tanınırdı. O, daha əvvəl daxili işlər naziri vəzifəsini də qısa müddət tutub.
Qəzada onun 42 yaşlı amerikalı həyat yoldaşı Stefani Holihan da ölüb. Keniyanın Mülki Aviasiya İdarəsi helikopterin Ololokvi dağı yaxınlığında, paytaxt Nayrobidən təxminən 250 kilometr şimalda qəzaya uğradığını açıqlayıb.
Xilasetmə qrupları helikopteri tamamilə dağılmış vəziyyətdə aşkarlayıb. Ərazinin mürəkkəb relyefi və yanğın axtarış-xilasetmə işlərini çətinləşdirib. Qəzanın səbəbi araşdırılır.
