Böyük Britaniya hökuməti işğal altındakı İordan çayının qərb sahilində İsrail yaşayış məntəqələrinin genişləndirilməsinə cavab olaraq yeni tədbirlər açıqlamağa hazırlaşır. Baş nazir Endi Börnhəm bu fəaliyyətin qəbuledilməz olduğunu bildirib.
ArabAZ xəbər verir ki, baş nazirin ofisindən yayılan açıqlamaya görə, hökumət İordan çayının qərb sahilində İsrail yaşayış məntəqələrinin sayının artmasına cavab olaraq yeni tədbirlər elan edəcək.
Börnhəmin işğal altındakı ərazidə yerləşən E1 yaşayış məntəqəsində 1 200-dən çox yeni mənzilin tikintisi üçün İsrail hökumətinin tender elan etməsindən sonra həmin yaşayış məntəqələri ilə əlaqəli mallara qadağa qoyulmasını təsdiqləməsi gözlənilir.
“Yuqov” şirkətinin son sorğusuna əsasən, hər iki britaniyalıdan biri qanunsuz İsrail yaşayış məntəqələri ilə ticarətə qadağa qoyulmasını dəstəkləyir. Sorğuda iştirak edənlərin yalnız 16 faizi belə qadağaya qarşı çıxıb.
2023-cü ilin oktyabrında Qəzzada müharibənin başlamasından sonra İordan çayının qərb sahilində İsrail məskunlaşanlarının və hərbçilərinin fələstinlilərə qarşı hücumları artıb.
Eyni dövrdə qanunsuz yaşayış məntəqələrinin salınması, yolların tikintisi və fələstinlilərin sərbəst hərəkətinə qoyulan məhdudiyyətlər də genişlənib.
