BAKI, AzerVoice, Nailə Babazadə
Əfqanıstanın şərqində yerləşən Kunar vilayətində 31 avqust bazar gecəsi baş verən 6 bal gücündə zəlzələdə həyatını itirənlərin sayı 2 min 205-ə yüksəlib.
AzerVoice xəbər verir ki,ToloNewsun Əfqanıstanın müvəqqəti hökumətinin sözçü müavini Həmdullah Fitratın açıqlamasına istinadən verdiyi xəbərə görə, Kunar vilayətində baş verən zəlzələ ilə bağlı ölən və yaralananların son sayı açıqlanıb.
Buna əsasən, zəlzələ nəticəsində ölənlərin sayı 2 min 205-ə, yaralananların sayı isə 3 min 640-a çatıb.
Kunar vilayətində zəlzələdən ən çox zərər görən Nur Gül, Savki, Çapa Dara və Manogi bölgələrində axtarış-xilasetmə işləri davam edir.
Qeyd edək ki, ABŞ Geoloji Araşdırmalar Mərkəzi (USGS) 31 avqust tarixində Əfqanıstanın Pakistan sərhədi yaxınlığında, Cəlalabad şəhərinin 27 kilometr şimal-şərqində, yerin 8 kilometr dərinliyində 6 bal gücündə zəlzələ baş verdiyini açıqlamışdı.
Əfqanıstanın müvəqqəti hökumətinin sözçüsü Zabihullah Mücahid daha əvvəl açıqlamışdı ki, zəlzələdə ölənlərin sayı min 411, yaralıların sayı isə 3 min 124 nəfərdir.
Yerli rəsmilər bu zəlzələnin ölkəni vuran ən güclü təbii fəlakətlərdən biri olduğunu bildiriblər.
