BAKI, AzerVoice
Böyük Britaniyanın Xarici Kəşfiyyat Xidmətinin (MI6) rəhbəri Riçard Mur bu gün, cümə günü bəyan edib ki, Rusiya Prezidenti Vladimir Putinin Ukraynada sülh danışıqlarına maraq göstərdiyinə dair “heç bir dəlil” yoxdur. Mur bu fikirləri İstanbulda çıxış edərkən səsləndirib.
AzerVoice xəbər verir ki, onun çıxışı zamanı Britaniya kəşfiyyatının “qara internetdən” (dark web) istifadə etməklə Rusiya və digər ölkələrdə yeni agentlər cəlb etmək və gizli məlumatlar toplamaq planlarını açıqlayıb.
Mur deyib ki, Putin “öz gücünü olduğundan artıq qiymətləndirib” və Ukraynalılara qarşı müharibədə yanlış hesablamalara yol verib.
Digər tərəfdən, Ukrayna Prezidenti Volodimir Zelenski cümə axşamı bəyan edib ki, o, şiddətli döyüşlərin davam etdiyi Donetsk bölgəsində (şərq) yerləşən Ukrayna əsgərlərini ziyarət edib.
Xatırladaq ki, Rusiya 2022-ci ildə Ukraynaya genişmiqyaslı işğala başlayıb və əsas hədəflərindən biri Donetsk vilayətini tam ələ keçirməkdir. Hazırda Rusiya ordusu bu istiqamətdə irəliləməyə çalışır, lakin müstəqil media qurumlarının məlumatına görə, böyük itkilər verir.
