BAKI, AzerVoice, Nailə Babazadə
ABŞ-ın prezidenti Donald Trampın İsrailə planlaşdırılan səfəri çərçivəsində ABŞ Hərbi Hava Qüvvələrinə məxsus altı ədəd C-17 “Globemaster III” tipli hərbi nəqliyyat təyyarəsi İsrailə doğru yola düşüb.
AzerVoice xəbər verir ki, bu barədə məlumatı İsrailin 12-ci kanalı yayıb. Bildirilib ki, təyyarələrin göndərilməsi Trampın səfərinə hazırlıq məqsədi daşıyır. C-17 tipli təyyarələr əsasən strateji və taktiki daşımalar, hərbi personal və texnikanın beynəlxalq miqyasda nəqli üçün istifadə olunur.
Tramp bazar ertəsi İsrailə gedəcək
Axios portalının yaydığı məlumata görə, Donald Tramp bazar ertəsi səhər saatlarında İsrailə çatacaq. Səfər zamanı onun Knessetdə çıxış edəcəyi və Qəzzada girov saxlanılan israilli əsirlərin ailələri ilə görüşəcəyi bildirilir.
Qeyd edək ki, bu səfər İsrail və HƏMAS arasında atəşkəs razılaşmasının qüvvəyə minməsindən dərhal sonra baş tutur. Razılaşma cümə günü, yerli vaxtla saat 12:00-da qüvvəyə minib və İsrail hökuməti onu həmin gün səhər təsdiqləyib.
Trampın “Sülh Planı” və beynəlxalq vasitəçilik
Donald Tramp ötən cümə axşamı bəyan edib ki, İsrail və HƏMAS onun hazırladığı “Sülh və məhbus mübadiləsi planının birinci mərhələsi” üzrə razılığa gəlib. Razılaşma ABŞ, Misir, Türkiyə və Qətərin vasitəçiliyi ilə Şarm əl-Şeyxdə keçirilən dörd günlük dolayı danışıqların nəticəsində əldə olunub.
Axios-un məlumatına əsasən, Tramp səfəri zamanı Qəzzədə atəşkəsə nəzarət məqsədilə İsrailə 200 amerikalı hərbçinin göndəriləcəyini açıqlayıb. Qüvvələr Qəzzəyə daxil olmayacaq, nəzarət İsrail ərazisində yaradılacaq xüsusi birgə mərkəzdən həyata keçiriləcək.
